అదిరిపోయే బడ్జెట్‌తో ప్రపంచాన్ని ఆశ్చర్యపరచండి: సీతారామన్‌కు ఆనంద్ మహీంద్రా

కేంద్ర ఆర్థికమంత్రి నిర్మలా సీతారామన్ ఫిబ్రవరి 1వ తేదీన బడ్జెట్ ప్రవేశ పెడుతున్నారు. ఈ నేపథ్యంలో ప్రధాని నరేంద్ర మోడీ, సీతారామన్‌లు వివిధ రంగాల ప్రముఖులతో భేటీ అయి సలహాలు, సూచనలు తీసుకుంటున్నారు. బడ్జెట్‌పై ప్రముఖ పారిశ్రామికవేత్త ఆనంద్ మహీంద్రా స్పందంచారు. ఆయన ఆసక్తికర వ్యాఖ్యలు చేశారు. ఈ మేరకు ట్వీట్ చేశారు.

చైనా వెనుకే ఉందామా.. ప్రపంచాన్ని ఆశ్చర్యానికి గురి చేయండి

2019-20 ఆర్థిక సంవత్సరంలో జీడీపీ వృద్ధిరేటు అంచనా 5 శాతంగా ఉందని, ఇంకా మనం చైనా కంటే వెనుకనే ఉందామా అని ఆయన పేర్కొన్నారు. మందగమనం నేపథ్యంలో పకడ్బంధీ చర్యలతో అదిరిపోయే బడ్జెట్‌ను ప్రవేశ పెట్టి ప్రపంచాన్ని ఆశ్చర్యానికి గురి చేయండని సీతారామన్‌కు ఆనంద్ మహీంద్రా సూచించారు.

మళ్లీ చైనా కంటే వెనుకే

చైనా 2019లో ఆరు శాతం నుంచి 6.5 శాతం ఆర్థిక వృద్ధి రేటును చేరుకుంటుందనే బ్లూమ్‌బర్గ్ ట్వీట్‌ను షేర్ చేశారు. 5 శాతం వృద్ధి రేటుతో భారత్ మరోసారి చైనా కంటే వెనుక ఉండిపోతుందని పేర్కొన్నారు.

నెటిజన్ ట్వీట్.. ఆనంద్ మహీంద్రా స్పందన

ఆనంద్ మహీంద్రా ట్వీట్‌కు ఓ నెటిజన్ రెస్పాండ్ అయ్యారు. సర్ మీరు చాలా ఎక్కువగా ఊహించుకుంటున్నారని, కాస్త శాంతించండని, బడ్జెట్ ప్రవేశ పెట్టిన తర్వాత మీరు నిరాశకు లోలవుతారని పేర్కొన్నారు.

సదరు నెటిజన్‌కు కూడా ఆనంద్ మహీంద్రా స్పందించారు. నేను శాంతించనని, నా ఆశావాదాన్ని కూడా ఆపే ప్రయత్నం చేయనని చెప్పారు.