నేటి నుండి ఈ పాల ధరలు రూ.2 పెంపు, అందుకే పెంచుతున్నాం

పాల వినియోగదారులకు షాక్. జూలై 1, 2021 నుండి పాల ధరలు పెంచుతున్నట్లు గుజరాత్ కోఆపరేటివ్ మిల్క్ మార్కెటింగ్ ఫెడరేషన్ (GCMMF) సీనియర్ అధికారి బుధవారం వెల్లడించారు. లీటర్ అమూల్ పాల పైన రూ.2 పెంచుతున్నట్లు తెలిపారు. ధరల పెంపుకు కారణాలను కూడా వెల్లడించారు.

పెరిగిన ఉత్పాదక వ్యయం ధరల పెంపునకు కారణమని స్పష్టం చేశారు. గత ఏడాదిన్నర కాలంగా ధరలను పెంచలేదని అమూల్ తెలిపింది. ప్యాకేజింగ్, రవాణా, విద్యుత్ సహా సంస్థాగత ఖర్చుల భారం పెరిగిందని, దీంతో ఈ భారం కొద్దిగా వినియోగదారులపై కూడా మోపక తప్పడం లేదని వెల్లడించింది. ప్రస్తుతం ప్రతిరోజు 150 లక్షల లీటర్ల అమూల్ పాలు సేల్ అవుతున్నాయి.

ఉత్ప‌త్తి వ్య‌యం పెర‌గ‌డంతో దాదాపు ఏడాదిన్న‌ర త‌ర్వాత పాల ధ‌ర‌ల‌ను పెంచవలసి వ‌చ్చింద‌ని GCMMF మేనేజింగ్ డైరెక్ట‌ర్ ఆర్ఎస్ సోధి అన్నారు. ఆవు, బ‌ర్రె పాల‌తో పాటు గోల్డ్, తాజా, శ‌క్తి, టీ స్పెష‌ల్ వంటి అమూల్ మిల్క్ బ్రాండ్స్ ధ‌ర‌లు పెర‌గ‌నున్నాయ‌న్నారు. ఆహార ద్ర‌వ్యోల్బ‌ణం పెర‌గ‌డంతో పాటు ప్యాకేజింగ్ ఖ‌ర్చు 30 నుండి 40 శాతం వ‌ర‌కు భారమైనట్లు తెలిపారు. ర‌వాణా వ్య‌యం 30శాతం ఎగ‌బాకింద‌న్నారు.