Closing Bell: భారీ లాభాల్లో ముగిసిన సెన్సెక్స్, నిఫ్టీ.. రిలయన్స్ ఏజీఎం ఎఫెక్ట్..!!

Market Closing: ఉదయం ఒడిదొడుకుల్లో ప్రారంభమైన దేశీయ స్టాక్ మార్కెట్లు చివరికి మంచి లాభాల్లో ప్రయాణాన్ని ముగించాయి. ఈ క్రమంలో ఇంట్రాడేలో ఐటీ, ఆయిల్ అండ్ గ్యాస్, ఎఫ్ఎంసీజీ రంగాలకు చెందిన కంపెనీల షేర్లు ర్యాలీని నమోదు చేశాయి.

మార్కెట్ల ముగింపు సమయంలో బెంచ్ మార్క్ సూచీ సెన్సెక్స్ 349 పాయింట్లు లాభపడగా, మరో కీలక సూచీ నిఫ్టీ 100 పాయింట్ల వృద్ధిని నమోదు చేసింది. ఇదే క్రమంలో నిఫ్టీ బ్యాంక్ సూచీ 9 పాయింట్లు పెరగగా, నిఫ్టీ మిడ్ క్యాప్ సూచీ 263 పాయింట్ల నష్టాన్ని చూసింది. ఉదయం నుంచి మార్కెట్లో చాలా మంది పెట్టుబడిదారులు అంబానీ సమావేశంలో ఎలాంటి ప్రకటనలు చేస్తారని ఆసక్తిగా ఎదురుచూశారు. కంపెనీ ఏఐ ఉత్పత్తులతో పాటు రిటైల్ వ్యాపార విస్తరణ వంటి ప్రణాళికలను పంచుకోవటంతో ఇన్వెస్టర్లలో జోష్ కనిపించింది. ఈ ప్రకటనలు రిలయన్స్ ఇండస్ట్రీస్ షేర్ల పెరుగుదలతో పాటు, మార్కెట్లను లాభాల దిశగా ప్రయాణానికి ప్రేరేపించింది.

ఈ క్రమంలో గతంలో రియలన్స్ ఏజీఎం సమయంలో నిఫ్టీ సూచీ ఎలా స్పందించింది, ఎంత రాబడులను అందించిందనే వివరాలు ప్రస్తుతం మార్కెట్లో ఇన్వెస్టర్ల దృష్టిని ఆకర్షిస్తు్నాయి. చివరిసారిగా ఆగస్టు 28, 2023లో రిలయన్స్ ఏజీఎం రోజున నిఫ్టీ సూచీ 0.21 శాతం లాభంతో తన ప్రయాణాన్ని కొనసాగించింది. అయితే నేడు బెంచ్ మార్క్ సూచీ నిఫ్టీ 0.40 శాతం వృద్ధిని చూసింది. అలాగే మార్కెట్ల క్లోజింగ్ సమయంలో రిలయన్స్ ఇండస్ట్రీస్ స్టాక్ ధర 1.55 శాతం వృద్ధి చెంది రూ.3042.90 వద్ద ఎన్ఎస్ఈలో క్లోజ్ అయ్యింది.

NSEలో టాటా మోటార్స్, బజాజ్ ఫిన్ సర్వ్, బ్రిటానియా, బజాజ్ ఫైనాన్స్, బీపీసీఎల్, హెచ్సీఎల్ టెక్నాలజీస్, బజాజ్ ఆటో, రిలయన్స్, ఐటీ, అపోలో హాస్పిటల్స్, హీరో మోటార్స్, టెక్ మహీంద్రా, విప్రో కంపెనీల షేర్లు లాభాలతో టాప్ గెయినర్లుగా ప్రయాణాన్ని ముగించాయి. అలాగే గ్రాసిమ్, మహీంద్రా అండ్ మహీంద్రా, జేఎస్డబ్ల్యూ స్టీల్, ఐషర్ మోటార్స్, కోటక్ బ్యాంక్, హిందాల్కొ, సన్ ఫార్మా, డాక్టర్ రెడ్డీస్, టాటా కన్జూమర్, ఇన్ఫోసిస్ కంపెనీల షేర్లు నష్టాలతో టాప్ లూజర్లుగా నిలిచాయి.