Ambani News: ఎయిర్‌టెల్‌ని వెంటాడుతున్న జియో.. యుద్ధం స్టార్ట్ చేసిన అంబానీ..

Reliance Jio: భారతీయ టెలికాం రంగంలో ముఖేష్ అంబానీ సంస్థ జియో పెద్ద మార్పులకు శ్రీకారం చుట్టిన సంగతి తెలిసిందే. 2016లో 4జీ సేవలతో సరికొత్తగా ప్రజల ముందుకు వచ్చిన జియో ఆట స్వరూపాన్ని పూర్తిగా మార్చేసింది. ఈ క్రమంలో పదుల సంఖ్యలో టెలికాం కంపెనీలు కనుమరుగైన సంగతి తెలిసిందే.

ఈ క్రమంలో ఆర్థిక సంక్షోభం నుంచి కోలుకుంటున్న ఆఫ్రికా దేశమైన ఘనా, తన ఆర్థిక వృద్ధిని పునరుద్ధరించేందుకు భారతీయ బిలియనీర్ ముఖేష్ అంబానీ మద్దతును కోరింది. అంబానీకి చెందిన టెలికాం కంపెనీ జియో ఆఫ్రికా దేశంలో హైస్పీడ్ బ్రాడ్‌బ్యాండ్ నెట్‌వర్క్ సేవలను అందించడానికి రంగంలోకి దిగింది. ఎయిర్‌టెల్ ఇప్పటికే ఆఫ్రికాలో భారీ స్థాయిలో ఉనికిని కలిగి ఉండగా.. తాజాగా ఇదే మార్కెట్లోకి రిలయన్స్ జియో భారీ ప్లాన్‌తో రంగంలోకి దిగుతోంది. ఇది వాస్తవానికి భారతీయ టెలికాం కంపెనీలు విదేశంలో యుద్ధానికి దిగుతున్నట్లు కనిపిస్తోంది.

తాజాగా అంబానీ నేతృత్వంలో పనిచేస్తున్న నెక్స్ట్-జెన్ ఇన్‌ఫ్రా కో(NGIC) తన మొదటి 5G నెట్‌వర్క్‌ను శుక్రవారం ప్రారంభించనుంది. ఘనాలో రిలయన్స్ జియో ఇన్ఫోకామ్ లిమిటెడ్ విజయాన్ని పునరావృతం చేయాలని కంపెనీ లక్ష్యంగా పెట్టుకుంది. ఈ నెక్స్ట్-జెన్ ఇన్‌ఫ్రా కో రిలయన్స్ అనుబంధ సంస్థ అయిన రాడిసిస్ పెట్టుబడి కింద పనిచేస్తోంది. వాస్తవానికి 2016లో జియో డేటాతో పాటు ఉచితంగా అపరిమిత కాల్స్ ప్యాక్ బండిల్ చేసి పెద్ద సంచలన టారిఫ్ రేట్లను అందుబాటులోకి తీసుకొచ్చిన సంగతి తెలిసిందే. ఇది కోట్ల మంది యూజర్లకు తక్కువ ఖర్చులో డేటాను అందుబాటులోకి తీసుకొచ్చింది. తాజాగా ఆఫ్రికా దేశం ఘనాలో నెక్స్ట్-జెన్ ఇన్‌ఫ్రా కో ప్రస్తుతం అదే మోడల్‌లో ముందుకెళుతున్నట్లు తెలుస్తోంది.

తక్కువ-ధరలో అధిక-వేగవంతమైన ఇంటర్నెట్ సేవ ఆర్థిక వృద్ధి, అభివృద్ధిని వేగవంతం చేస్తుందని ఘనా ప్రభుత్వం భావిస్తోంది. ఇది గ్రామీణ ప్రాంతాలకు ఇంటర్నెట్ సేవలను విస్తరింపజేసి.. దేశ ప్రభుత్వం వ్యాపార కార్యకలాపాలను పెంచుతోందని భావిస్తోంది. అలాగే వ్యవస్థాపకులకు కొత్త అవకాశాలను సృష్టిస్తోంది. అంబానీకి చెందిన జియో 5G నెట్‌వర్క్ పరిచయం ఘనా ఆర్థిక కార్యకలాపాలను పెంచడానికి, దాని రుణ సంక్షోభం నుంచి కోలుకోవడానికి ప్రణాళికలో భాగంగా ఉంటుందని భావిస్తున్నారు.

జూలై 2024లో ఘనా అధ్యక్షుడు నానా అకుబో-అడో చిన్న మధ్య తరహా పరిశ్రమలకు చౌకగా రుణాలు అందించే కార్యక్రమాన్ని ప్రారంభించారు. ఇది దేశం GDP వృద్ధికి గణనీయంగా దోహదం చేస్తుంది. కనెక్టివిటీని మెరుగుపరచడానికి సాంకేతికతను ఉపయోగించుకోవడం ద్వారా, ఘనా తన ఆర్థిక సామర్థ్యాన్ని వెలికితీసి సంపన్న దేశంగా మారాలని ప్రయత్నిస్తోంది.