Amazon: అమెజాన్ సరికొత్త రవాణా సేవలు.. ఇండియాలో వేల ఏళ్ల నాటి ఫార్ములా వాడకం..

Amazon News: అమెరికా ఈ-కామర్స్ దిగ్గజం అమెజాన్ ఇందుగలను అందులేను అన్నట్లుగా ఇండియాలో తన వ్యాపారవిస్తరణకు అన్ని మార్గాలను వినియోగించుకుంటోంది. తాజాగా దీనికోసం భారత ప్రభుత్వంతో చేతులు కలిపింది.

అమెజాన్ తన రవాణా ఖర్చులను తక్కువగా ఉండేలా చూసేందుకు కొత్త ప్రణాళికతో ముందుకొచ్చింది. ఈ క్రమంలో గంగా నదిపై సరకు రవాణాను పెంచేందుకు అమెరికా ఈ-కామర్స్ ప్లాట్‌ఫామ్ తన అమెజాన్ సెల్లర్ సర్వీసెస్, కేంద్ర ప్రభుత్వం ఆధ్వర్యంలోని ఇన్‌ల్యాండ్ వాటర్‌వేస్ అథారిటీ ఆఫ్ ఇండియా మధ్య బుధవారం ఒప్పందంపై సంతకాలు చేశాయి. ముందుగా దీనిని పాట్నా-కోల్‌కతా జలమార్గంలో పైలట్ ప్రాజెక్టు రూపంలో ప్రారంభించనున్నట్లు వెల్లడైంది.

పోర్ట్స్, షిప్పింగ్, జలమార్గాల మంత్రిత్వ శాఖ ఆధ్వర్యంలో అమెజాన్ ఇండియా IWAIతో అవగాహన ఒప్పందంపై సంతకం చేసింది. తాజా ఒప్పందంతో అమెజాన్ ఇండియా తన సరఫరా గొలుసును 14,500 కి.మీ పొడవునా పాట్నా-కోల్‌కతా విస్తీర్ణంలో నదులు, కాలువలు, బ్యాక్ వాటర్స్, క్రీక్స్‌లో విస్తరిస్తోంది. దీనికి ముందు జనవరిలో కంపెనీ తన అమెజాన్ ఎయిర్‌ సర్వీస్‌ను ప్రారంభించడం ద్వారా దేశంలో తన కార్గో నెట్‌వర్క్‌ను విస్తరించడం మెుదలు పెట్టింది. దీని తర్వాత జలమార్గాలను మెరుగుపరచటంపై కంపెనీ దృష్టి సారించింది.

పైలట్ ప్రాజెక్టు విజయవంతమైతే దీనిని పెద్ద ఎత్తున విస్తరిస్తామని కంపెనీ చెబుతోంది. రోడ్డు రవాణా కంటే నీటిలో 91.6 శాతం తక్కువ ఇంధన వినియోగం ఉంటుంది. దేశంలో జమ రవాణాను మెరుపరిచే క్రమంలో కేంద్రం 113 ప్రాజెక్టులతో కూడిన సాగరమాల ప్రాజెక్టును ప్రారంభించింది. దీనికోసం దాదాపు రూ.7,030 కోట్లను వెచ్చించింది. దీని ద్వారా 2030 నాటికి 200 మిలియన్ మెట్రిక్ టన్నుల కంటే ఎక్కువ సరకును అంతర్గత జలరవాణా ద్వారా ట్రాన్స్‌పోర్ట్ చేయాలని కేంద్రం లక్ష్యంగా పెట్టుకుంది.