Amazon News: అమెజాన్ గ్రీన్ సిగ్నల్.. ఉద్యోగుల ఆటలకు చెక్.. జాగ్రత్త

Amazon News: అమెరికన్ టెక్ కంపెనీ అమెజాన్ తాజాగా సంచలన నిర్ణయం తీసుకుంది. ఇందులో భాగంగా మేనేజర్లకు పూర్తి స్వేచ్ఛతో కూడిన బాధ్యతను అప్పగించింది.

అమెజాన్ తన రిటర్న్-టు-ఆఫీస్ విధానం విషయంలో చాలా సీరియస్‌గా ఉంది. ఉద్యోగులు వారంలో మూడు రోజులు కార్యాలయం నుంచి పనిచేయాలని ఇప్పటికే స్పష్టం చేసింది. అయితే దీనిని ఫాలో అవ్వని ఉద్యోగులను ఉపేక్షించకుండా వెంటనే తొలగించేందుకు కంపెనీలోని మేనేజర్లకు పవర్స్ ఇచ్చింది. తన విధానాన్ని తప్పకుండా అమలు చేయాలనే లక్ష్యంతో ఈ కఠినమైన చర్య తీసుకోబడిందని సమాచారం.

అమెజాన్ తన రిటర్న్-టు-ఆఫీస్ పాలసీకి సంబంధించి తన గ్లోబల్ మేనేజర్ మార్గదర్శకత్వాన్ని అప్‌డేట్ చేసినట్లు ఇన్‌సైడర్ నివేదిక వెల్లడించింది. కంపెనీలో అంతర్గతంగా దీనికి సంబంధించిన ఆదేశాలు జారీ అయ్యాయని తెలిపింది. కంపెనీ మూడు రోజుల పాలసీకి కట్టుబడి ఉండని ఉద్యోగుల విషయంలో మేనేజర్లు ఉపేక్షించొద్దని, వారితో ఎలా వ్యవహరించాలో అందులో సూచించింది. రిటర్న్-టు-ఆఫీస్ ఆదేశాన్ని పాటించడంలో విఫలమైన ఉద్యోగులను సమర్థవంతంగా తొలగించడానికి మేనేజర్‌లకు వెసులుబాటు కల్పిస్తోందని స్పష్టం చేసింది.

ఈ పాలసీ మూడు దశల ప్రక్రియ ద్వారా అమలు చేయనున్నారు. మొదటి దశలో నాన్-కంప్లైంట్ ఉద్యోగులతో ప్రైవేట్ సంభాషణను కలిగి ఉండాలి. నిబంధనలు పాటించకపోవడం కొనసాగితే, ఉద్యోగి కార్యాలయానికి తిరిగి రావడానికి నిరాకరిస్తే, రెండవ సమావేశాన్ని 1-2 వారాల సమయ వ్యవధిలో నిర్వహించాలి. మేనేజర్‌లు వారంలో కనీసం మూడు రోజులు కార్యాలయానికి తిరిగి రావాలనే ఉద్యోగ ఆవశ్యకతను ఈ సమావేశంలో నొక్కిచెప్పాల్సి ఉంటుంది. క్రమశిక్షణా చర్యలకు ఇది దారితీయెుచ్చని హెచ్చరించాల్సి ఉంటుంది. చివరిగా హెచ్ ఆర్ డిపార్ట్మెంట్ రంగంలోకి దిగి తగిన చర్యలు తీసుకుంటుంది.

అమెజాన్ మే నెలలోనే తన ఉద్యోగులను వారానికి కనీసం మూడు రోజుల పాటు ఆఫీసులకు రావాల్సిందిగా కోరింది. జూలైలో రిమోట్ ఉద్యోగులను ఆఫీసు "హబ్‌ల"కు దగ్గర ప్రాంతాలకు రీలొకేట్ కావాల్సిందిగా సూచించింది. దీనికి ఇష్టం లేని వారు స్వచ్ఛందంగా రాజీనామా చేసేందుకు ప్యాకేజీని కూడా అందించింది. ఇలా వ్యాపార ప్రతికూలతల మధ్య పరిస్థితులను చక్కబెట్టేందుకు క్రమపద్ధతిలో ఉద్యోగులను తిరిగి ఆఫీసులకు రప్పించే ప్రయత్నాలు అమెజాన్ కొనసాగిస్తోంది.