IT News: అమెజాన్‌లో వింత సాంప్రదాయం.. ఉద్యోగం మానేస్తే లక్షల్లో పరిహారం!

దాదాపు ప్రతి కంపెనీ.. ఉద్యోగులు తమ నుంచి జారిపోకుండా చూసుకుంటాయి. తద్వారా అనుభవం, నైపుణ్యం కలిగిన శ్రామిక శక్తికి పెద్దపీట వేస్తాయి. అయితే ప్రముఖ ఇ-కామర్స్ దిగ్గజం అమెజాన్‌ లో పరిస్థితి మాత్రం ఇందుకు పూర్తి భిన్నంగా ఉంటుందని తెలిస్తే ఆశ్చర్యపోవాల్సిందే.

గతేడాది సుమారు 18 వేల మంది ఉద్యోగులకు టెక్ దిగ్గజం అమెజాన్ వీడ్కోలు పలికింది. అనంతరం ఈ సంవత్సరం మార్చిలో వారికి అదనంగా 9 వేల మందిపై వేటు వేసింది. అయితే కంపెనీ నుంచి స్వచ్ఛందంగా నిష్క్రమించాలనుకునే వారికి మాత్రం బంపర్ ఆఫర్ ఇచ్చింది.

వీరికి ఒక్కొక్కరికీ ఏకంగా 4 లక్షల మేర ఇచ్చి వదిలించుకునేందుకు సంస్థ అధినేత జెఫ్ బెజోస్ ప్రతిపాదించారు. 'పే టు క్విట్' పేరిట 2014 నుంచి కంపెనీ ఓ ప్రాగ్రామ్‌ ను నిర్వహిస్తోంది. అయితే ఇది నిజంగా ఉద్యోగులను వదిలించుకోవడానికి తీసుకొచ్చిన కార్యక్రమం అనుకుంటే పొరపాటే.

సంస్థ పట్ల అంకిత భావంతో పనిచేసే వారి నుంచి నిష్క్రమించాలనుకునే వారిని గుర్తించడమే దీని లక్ష్యం. అందుకే స్వచ్ఛందంగా రాజీనామా చేసేందుకు ముందుకు వచ్చే వారిని.. 'దయచేసి ఈ ఆఫర్ తీసుకోవద్దు' అని ఇన్వెస్టర్లకు బెజోస్ రాసిన తన వార్షిక లేఖలో సూచించారు.