నిద్ర లేవగానే జాబ్ పోయిందనే మెసేజ్.. 14 వేల మంది ఉద్యోగులకు షాకిచ్చిన అమెజాన్

ప్రపంచంలోని అతిపెద్ద టెక్ సంస్థలలో ఒకటైన అమెజాన్ నుంచి మరోసారి భారీ ఉద్యోగాల కోత షాక్‌ను టెక్ ప్రపంచంలో కలకలం రేపింది. ఈసారి ఉద్యోగులను తొలగించే విధానం మరింత ఆశ్చర్యకరంగా మారింది. ఎందుకంటే, చాలామంది ఉద్యోగులు తెల్లవారకముందే టెక్స్ట్ మెసేజ్‌ల రూపంలో తమ తొలగింపు సమాచారాన్ని పొందారు. బిజినెస్ ఇన్‌సైడర్ వెల్లడించిన వివరాల ప్రకారం..అమెజాన్ సుమారు 14 వేల మంది ఉద్యోగులను బహుళ బృందాల నుండి తొలగించింది.

బాధితులకు కేవలం కొన్ని నిమిషాల వ్యవధిలో రెండు మెసేజ్‌లు పంపబడ్డాయి. మొదటి మెసేజ్‌లో దయచేసి మీ ఇమెయిల్ తనిఖీ చేయండి అని ఉండగా, రెండో మెసేజ్‌లో మీ పాత్ర గురించి ఇమెయిల్ అందకపోతే హెల్ప్ డెస్క్‌ను సంప్రదించండి అని పేర్కొన్నారు. ఈ మెసేజ్‌లు ఇమెయిల్ నోటిఫికేషన్‌ల తర్వాత వెంటనే పంపబడినట్లు తెలుస్తోంది. కంపెనీ ప్రకారం ఇది ఉద్యోగుల బ్యాడ్జ్ యాక్సెస్ నిలిపివేయడం వల్ల కార్యాలయాల్లో గందరగోళం లేదా ఉద్రిక్తతలు ఏర్పడకుండా ఉండేందుకు తీసుకున్న జాగ్రత్త చర్యగా తెలుస్తోంది.

అయితే, ఉద్యోగులను టెక్స్ట్‌ ద్వారా తొలగించడం అనే ఈ నిర్ణయం కంపెనీ లోపల, బయట పెద్ద చర్చకు దారితీసింది. కార్పొరేట్ పునర్నిర్మాణం క్రమంలో మానవ సంబంధం లేకుండా తీసుకునే ఈ నిర్ణయాలు ఉద్యోగుల మనోభావాలపై తీవ్ర ప్రభావం చూపుతున్నాయని పలువురు విమర్శిస్తున్నారు. గత కొన్నేళ్లుగా గూగుల్, టెస్లా వంటి ప్రముఖ టెక్ కంపెనీల్లో కూడా ఇలాంటి పద్ధతులు పెరుగుతున్నాయి. కొంతమంది ఉద్యోగులు రాత్రిపూట నిద్రలేచే సరికి తమ లాగిన్ యాక్సెస్ రద్దయిందని, అకౌంట్ డియాక్టివేట్ అయ్యిందని గుర్తించే పరిస్థితులు నెలకొన్నాయి.

అమెజాన్‌లో తాజా ఉద్యోగాల కోత ప్రధానంగా రిటైల్ మేనేజ్‌మెంట్ మరియు సపోర్ట్ టీమ్‌లను లక్ష్యంగా చేసుకుంది. కంపెనీ ప్రకారం, ఇది ఆపరేషన్లను క్రమబద్ధీకరించి, వేగంగా ఆవిష్కరణలు చేయడానికి తీసుకున్న వ్యూహాత్మక నిర్ణయం అని చెప్పవచ్చు. అమెజాన్ హెచ్‌ఆర్‌ హెడ్ బెత్ గాలెట్టి ఉద్యోగులకు పంపిన అంతర్గత సందేశంలో.. ఈ నిర్ణయాలు తేలికగా తీసుకోలేదు. ప్రభావిత ఉద్యోగులకు 90 రోజుల పూర్తి జీతం, ప్రయోజనాలు, సేవరెన్స్ ప్యాకేజ్, కొత్త ఉద్యోగాల కోసం సహాయం అందించబడుతుందని పేర్కొన్నారు.

ఆమె తన బ్లాగ్ పోస్టులో కూడా ఈ అంశాన్ని ప్రస్తావిస్తూ.. ప్రపంచం వేగంగా మారుతోంది. ఈ తరం AI (కృత్రిమ మేధస్సు) సాంకేతికత ఇంటర్నెట్‌ తర్వాత అత్యంత పరివర్తనాత్మకమైనది. ఇది కంపెనీలకు వేగంగా ఆవిష్కరణలు చేయడానికి మార్గం చూపుతోందని రాశారు. అంతర్గత ఇమెయిల్‌లో తొలగింపు ప్రక్రియను దశలవారీగా వివరించారు. ఇందులో ఉద్యోగులకు వారి బ్యాడ్జ్ యాక్సెస్ నిలిపివేయబడిందని, వర్క్ నాన్‌-పీరియడ్ వెంటనే ప్రారంభమవుతుందని, ఆ సమయంలో వారు పూర్తి జీతం, ప్రయోజనాలను పొందుతారని గాలెట్టి పేర్కొన్నారు.

ఉద్యోగులు Amazon A to Z యాప్, MyHR ప్లాట్‌ఫారమ్‌ల ద్వారా మద్దతు, వస్తువుల రిటర్న్ లేదా పరికరాల సమర్పణ వంటి చర్యలు తీసుకోవాలని సూచించారు. మీకు ఏ ఇబ్బంది వచ్చినా HR టీమ్ 24/7 అందుబాటులో ఉంటుంది. ఈ మార్పు సమయంలో మీకు సహాయం అందించడంలో నేను వ్యక్తిగతంగా కట్టుబడి ఉన్నాను అని పేర్కొన్నారు. అమెజాన్ రాబోయే త్రైమాసికంలో రికార్డు స్థాయి 140 బిలియన్ డాలర్ల అమ్మకాల ను సాధించే అవకాశం ఉందని విశ్లేషకులు అంచనా వేస్తున్నారు. అయినప్పటికీ AI ఆధారిత ఆటోమేషన్ పెరుగుతున్న నేపథ్యంలో ఖర్చు తగ్గింపు, చురుకైన వ్యూహం అవసరం కావడంతో కంపెనీ ఈ ఉద్యోగాల కోతను అమలు చేసినట్లు తెలుస్తోంది.