తెలుగు, కన్నడ, తమిళం, మలయాళంలోను అమెజాన్ సేవలు

అమెజాన్ ఇండియా మంగళవారం నుండి తన వెబ్‌సైట్, యాప్‌ను వివిధ భారతీయ భాషల్లో అందిస్తోంది. మరింతమంది కస్టమర్లను ఆకట్టుకునేందుకు తెలుగుతో పాటు తమిళం, కన్నడ, మలయాళ భాషల్లో తమ ఉత్పత్తుల గురించి తెలియజేస్తున్నట్లు అమెజాన్ ఇండియా కస్టమర్ ఎక్స్‌పీరియన్స్ డైరెక్టర్ తెలిపారు. దీంతో కొత్తగా 20 కోట్ల నుండి 30 కోట్ల మంది వినియోగదారులకు సులభంగా ఆన్‌లైన్ షాపింగ్‌ను వినియోగించుకునే అవకాశముందన్నారు.

ఈ కామర్స్‌ దిగ్గజం అమెజాన్.ఇన్ తాజాగా ఇంగ్లీష్, హిందీతో పాటు కన్నడ, మలయాళం, తమిళంలోను సేవలు అందుబాటులోకి తీసుకు వచ్చింది. ఇప్పటికే ఈ పోర్టల్ ఇంగ్లీష్, హిందీలో సేవలు అందిస్తోంది. ఆన్‌లైన్ షాపింగ్‌లో కస్టమర్లకు భాషాపరమైన అడ్డంకులను తొలగించేందుకే ఈ నిర్ణయం తీసుకుంది. వచ్చే పండుగల సీజన్ నేపథ్యంలో కోట్లాదిమంది వినియోగదారులను చేరుకునేందుకు దోహదం చేస్తుందని చెబుతోంది.

కస్టమర్లు తమకు అనువైన భాషలో డీల్స్, డిస్కౌంట్స్ తెలుసుకోవడం, ఉత్పత్తుల సమాచారం చదువుకోవడం, ఖాతాల నిర్వహణ, ఆర్డర్స్, చెల్లింపులు జరిపేందుకు మార్గం మరింత ఈజీ అవుతుందని అమెజాన్ కస్టమర్ ఎక్స్‌పీరియెన్స్, మార్కెటింగ్ డైరెక్టర్ కిషోర్ తోట అన్నారు. నాలుగు భాషల చేరిక గొప్ప మైలురాయిగా నిలుస్తుందన్నారు. ఆండ్రాయిడ్, ఐవోఎస్ యాప్స్, మొబైల్, డెస్క్‌టాప్‌లో కస్టమర్లు తమకు ఇష్టమైన భాషను ఎంచుకోవచ్చు. కస్టమర్ సర్వీస్ సిబ్బందితో తెలుగు, ఇంగ్లీష్, హిందీ, కన్నడ, తమిళ భాషల్లో మాట్లాడవచ్చు.