గల్లా జయదేవ్‌కు కొత్త బాధ్యతలు, లిథియం-అయాన్ విభాగంలోకి అమరరాజా

తెలుగు రాష్ట్రాలకు చెందిన అమరరాజా బ్యాటరీస్ ఇంధన, మొబిలిటీ రంగాల్లో వేగంగా వస్తోన్న మారపులకు అనుగుణంగా లిథియం అయాన్ బ్యాటరీస్ టెక్నాలజీతో సహా గ్రీన్ టెక్నాలజీలలో పెట్టుబడులు పెట్టనుంది. గ్రీన్ టెక్నాలజీలలో పెట్టుబడులతో పాటు కంపెనీ ఉన్నతస్థాయి బాధ్యతల్లో కొత్త రక్తాన్ని తీసుకు వస్తున్నారు. ఇందులో భాగంగా ఇప్పటి వరకు వైస్ చైర్మన్‌గా ఉన్న గల్లా జయదేవ్ అమరరాజా బ్యాటరీస్ సంస్థ చైర్మన్‌గా బాధ్యతలు స్వీకరించనున్నారు.

అలాగే, హర్షవర్థన్ గౌరినేని, విక్రమాదిత్య గౌరినేని ఎగ్జిక్యూటివ్ డైరెక్టర్లుగా బాధ్యతలు స్వీకరిస్తారు. కీలకరంగాల్లో వృద్ధిని మరింత పెంచేందుకు ఎనర్జీ అండ్ మొబిలిటీ వ్యూహాన్ని అనుసరిస్తున్నట్లు అమరరాజా తెలిపింది. ఉత్పత్తుల పోర్ట్‌ఫోలియో, కొత్త ప్రాంతాలకు విస్తరణ ద్వారా లెడ్ యాసిడ్ బ్యాటరీ వ్యాపారంలో వ్యాల్యూను పెంచడంపై దృష్టి సారిస్తోంది.

అమరరాజా బ్యాటరీస్ లిమిటెడ్ వ్యవస్థాపకులు డాక్టర్ రామచంద్రనాయుడు ఇప్పటి వరకు చైర్మన్ హోదాలో ఉన్నారు. ఆయన ఈ బాధ్యతల నుండి తప్పుకొని, వైస్ చైర్మన్‌గా ఉన్న గల్లా జయదేవ్‌కు బాధ్యతలు అప్పగించనున్నారు. ఈ మేరకు కంపెనీ సోమవారం ఓ ప్రకటనలో తెలిపింది. రామచంద్రనాయుడు చైర్మన్‌గా పునర్నియామకాన్ని కోరరాదని నిర్ణయించుకున్నారు.