ఆ కంపెనీ కోసం పోరాడుతున్న అదానీ-అంబానీ.. మధ్యల్లో ఇరుక్కున్న ప్రభుత్వం.. గెలుపెవరిది..?

Ambani Vs Adani: దేశంలో ఏ కంపెనీని కొనాలన్నా లేదా అమ్మాలన్నా అది తప్పకుండా అదానీ, అంబానీలను దాటాల్సిందే అన్నంత పోటీ నడుస్తోంది. రంగం ఏదైనా అవకాశాలను మాత్రం అంబానీ, అదానీలే అవకాశాలను అందిపుచ్చుకుంటున్నారు.

మరోసారి పోటీ..

దిగ్గజ వ్యాపారవేత్తలైన గౌతమ్ అదానీ, ముఖేష్ అంబానీల మధ్య మరో ఆసక్తికర పోటీ నెలకొంది. ఈ రెండు వ్యాపారవేత్తలకు చెందిన కంపెనీలతో సహా మెుత్తం ఏడు కంపెనీలు ఛత్తీస్‌గఢ్‌కు చెందిన పవర్ కంపెనీ SKS పవర్ జనరేషన్ కోసం బిడ్ చేశాయి. ఇదే సమయంలో అంబానీ-అదానీలతో పాటు ప్రభుత్వం కూడా ఈ కంపెనీని దక్కించుకునేందుకు ఆసక్తి చూపుతోంది. బ్యాంక్ ఆఫ్ బరోడా, స్టేట్ బ్యాంక్ ఆఫ్ ఇండియా పవర్ కంపెనీకి రూ. 1,890 కోట్లకు పైగా రుణాన్ని అందించాయి. దీనికి ముందు అంబానీ, అదానీలు కూడా ల్యాంకో అమర్‌కంటక్ పవర్ కోసం వేలంలో పోటీపడ్డాయి.

పోటీలో ప్రభుత్వం..

బ్యాంకులకు సంబంధించిన మూలాల ప్రకారం మెుత్తం ఏడు బిడ్లు వచ్చాయని తెలుస్తోంది. తాజా బిడ్డింగ్ ప్రక్రియలో కంపెనీని దక్కించుకోవటానికి అదానీ, అంబానీ, ఎన్‌టీపీసీలతో పాటు టోరెంట్ పవర్, జిందాల్ పవర్, శారదా ఎనర్జీ అండ్ మినరల్స్, సింగపూర్‌కు చెందిన వాంటేజ్ పాయింట్ అసెట్ మేనేజ్‌మెంట్ కూడా SKS పవర్ జనరేషన్ కంపెనీ కోసం బిడ్ చేశాయి. బిడ్డింగ్‌కు డిసెంబర్ 30 చివరి తేదీ.

4 సార్లు గడువు పొడిగింపు..

కంపెనీకి చెందిన 600 మెగావాట్ల బొగ్గు ఆధారిత పవర్ ప్లాంట్ వర్కింగ్ కండిషన్లో ఉంది. దీనిని దక్కించుకునేందుకు మొత్తం 23 కంపెనీలు ఆసక్తి చూపాయి. చివరి బిడ్ల సమర్పణకు గడువును బ్యాంకులు ఇప్పటికి 4 సార్లు పొడిగించాయి. దీన్ని ముందుకు తీసుకెళ్లాలని కొందరు బిడ్డర్లు డిమాండ్ చేయడమే ఇందుకు కారణం. NTPC తన సొంత బోర్డు, ప్రభుత్వం నుంచి అనుమతి పొందడానికి మరింత సమయం అవసరమని పేర్కొంది. SKS కార్పొరేట్ దివాలా, పరిష్కార ప్రక్రియ ఏప్రిల్‌లో ప్రారంభమైంది.

అన్ని సౌకర్యాలు..

ప్రభుత్వ యాజమాన్యంలోని ఎన్‌టీపీసీ ప్రస్తుతం 300 మెగావాట్ల సామర్థ్యం ఉన్న రెండు యూనిట్లను నడుపుతోంది. ఆర్థిక సంక్షోభం కారణంగా హాంకాంగ్‌కు చెందిన అగ్రిట్రేడ్ రిసోర్సెస్ కంపెనీ దీన్ని ఆపరేట్ చేయడంలో విఫలమైంది. ఈ కారణంగా విఫలమవడంతో గత ఏడాది ప్రారంభంలో కంపెనీని మూసివేయాల్సి వచ్చింది. ఈ పవర్ కంపెనీని అగ్రిట్రేడ్ 2019లో కొనుగోలు చేసింది. సౌత్ ఈస్టర్న్ కోల్‌ఫీల్డ్స్‌తో ప్లాంట్ 25 ఏళ్ల ఇంధన సరఫరా ఒప్పందాన్ని కలిగి ఉంది. బొగ్గు రవాణా చేయడానికి ప్లాంట్ వరకు రైల్వే లైన్ కూడా ఉంది.