వడ్డీ రేట్లు తగ్గించిన అలహాబాద్ బ్యాంకు, మార్చి 1 నుండి అమలు

అలహాబాద్ బ్యాంకు శనివారం రుణాలపై వడ్డీ రేట్లను తగ్గిస్తున్నట్లు ప్రకటించింది. తమ ఎక్స్‌టర్నల్ బెంచ్ మార్క్ ఆధారిత వడ్డీ రేట్లను 40 బేసిస్ పాయింట్ల వరకు తగ్గిస్తూ బ్యాంక్ ఆస్తుల బాధ్యత, నిర్వహణ కమిటీ నిర్ణయం తీసుకుంది. కొత్త వడ్డీ రేట్లు ఆదివారం (మార్చి 1వ తేదీ) నుంచే అమల్లోకి వస్తాయని ఆ ప్రకటనలో తెలిపింది. దీంతో కస్టమర్లకు, ముఖ్యంగా రిటైల్ రుణగ్రహీతలకు ప్రయోజనం చేకూరుతుంది. రిజర్వ్ బ్యాంక్ ఆఫ్ ఇండియా (RBI) రెపో రేటు 5.15%గా ఉంది.

ఎక్స్టర్నల్ బెంచ్ మార్క్ వడ్డీ రేట్లను అసెట్ లయబిలిటీ కమిటీ (ALCO) తగ్గిస్తూ నిర్ణయం తీసుకుందని, ఇవి మార్చి 1వ తేదీ నుండి అమలులోకి వస్తాయని అలహాబాద్ బ్యాంకు రెగ్యులేటరీకి సమర్పించిన ఫైలింగ్‌లో తెలిపింది. 2019 ఫిబ్రవరి నుండి ఆర్బీఐ రెపో రేటును 135 బేసిస్ పాయింట్లు తగ్గించింది.

ఆర్బీఐ రెపో రేటు తగ్గించిన నేపథ్యంలో ఎస్పీఐ సహా వివిధ బ్యాంకులు వడ్డీ రేట్లను తగ్గిస్తూ వచ్చాయి. రెపో రేటు తగ్గడం వల్ల బ్యాంకుల నుండి వివిధ రకాల రుణాలు తీసుకునే వారిపై భారం తగ్గుతుంది. అదే సమయంలో డిపాజిట్ చేసే వారికి వడ్డీ రేటు తగ్గి వస్తుంది.