Airtel Outage: ఎయిర్‌టెల్ ఇంటర్నెట్ సేవలకు అంతరాయం, నెటిజన్ల సెటైర్లు

ఎయిర్‌టెల్ ఇంటర్నెట్ సర్వీసులకు నేడు అంతరాయం కలిగింది. దేశవ్యాప్తంగా పలు ప్రాంతాల్లో అంతరాయం ఏర్పడింది. ఉదయం గం.11.30 సమయానికి సేవల్లో ఇబ్బందులు తలెత్తినట్లు సోషల్ మీడియాలో నెటిజన్లు పోస్టులు పెట్టారు. వెంటనే అప్రమత్తమైన ఎయిర్‌టెల్ సమస్యను పరిష్కరించినట్లు తెలిపింది. కేవలం పది నిమిషాల్లో సేవలను పునరుద్ధరించినట్లు వెల్లడించింది. అసౌకర్యానికి కస్టమర్లను క్షమాపణలు కోరింది.

ఎయిర్‌టెల్ ఇంటర్నెట్ సేవల్లో అంతరాయంపై నెటిజన్లు తీవ్రంగా మండిపడ్డారు. ఎయిర్‌టెల్ ఫైబర్ డౌన్ అయిందని, ఆ తర్వాత కాసేపటికి వచ్చిందని ఓ నెటిజన్ ట్వీట్ చేశారు. బ్రాడ్ బాండ్ కనెక్షన్ లేదని, అలాగే మొబైల్ నెట్ వర్క్ లేదని, ఎయిర్ టెల్ యాప్‌లోకి లాగ్-ఇన్ కాలేకపోతున్నామని మరో నెటిజన్ ట్వీట్ చేశారు. ఫ్లైట్ మోడ్ అంటూ మరో నెటిజన్ చమత్కరించారు. సోషల్ మీడియాలో నెటిజన్లు అసంతృప్తిని వ్యక్తం చేస్తూ, మీమ్స్ రూపంలో అభిప్రాయాలు వ్యక్తపరిచారు.

దేశంలోని ప్రధాన నగరాలైన ఢిల్లీ, మంబై, కోల్‌కతా, బెంగళూరు, హైదరాబాద్, జైపూర్, అహ్మదాబాద్ సహా పలు ప్రాంతాల్లో సేవలు కాసేపు నిలిచిపోయాయి. దీంతో మొబైల్ ఇంటర్నెట్‌తో పాటు ఎయిర్‌టెల్ బ్రాడ్ బాండ్ కస్టమర్లు సమస్యలు ఎదుర్కొన్నారు.