Airtel: యూజర్లకు ట్విస్ట్ ఇచ్చిన ఎయిర్‌‌టెల్! ఇకపై పర్‌‌ప్లెక్సిటీ ప్లాన్ పని చేయదా?

కస్టమర్లను ఆకట్టుకోవడానికి ఎయిర్‌‌టెల్ (Airtel) ఎప్పుడూ కొత్త ఆఫర్లతో వస్తుంటుంది. అయితే తాజాగా ఒక భారీ ఆఫర్ విషయంలో ఎయిర్‌టెల్ యూ-టర్న్ తీసుకోవడం ఇప్పుడు సోషల్ మీడియాలో చర్చనీయాంశంగా మారింది. గతేడాది జూలైలో ఏఐ సెర్చ్ ప్లాట్‌ఫారమ్ 'పర్‌ప్లెక్సిటీ' (Perplexity) తో జతకట్టిన ఎయిర్‌టెల్.. తన 360 మిలియన్ల వినియోగదారులకు రూ. 17,000 విలువైన 'పర్‌ప్లెక్సిటీ ప్రో' ప్లాన్‌ను ఏడాది పాటు ఉచితంగా ఇస్తామని ప్రామిస్ చేసింది. కానీ, ఫిబ్రవరి 18, 2026 నాటికి ఈ అధ్యాయం ముగిసిపోయింది.

అసలేం జరిగింది?

ఎయిర్‌టెల్ అందించిన ఈ 'పర్‌ప్లెక్సిటీ ప్రో' సబ్‌స్క్రిప్షన్ కొత్త వినియోగదారులకు ఇకపై అందుబాటులో ఉండదు. జనవరి 16 వ తేదీనే ఈ ఆఫర్‌ను యాక్టివేట్ చేసుకునే గడువు ముగిసిందని కంపెనీ ప్రకటించింది. అంటే మీరు ఇప్పటివరకు ఈ ఆఫర్‌ను క్లెయిమ్ చేయకపోతే, ఇకపై మీకు అది లభించదు. అయితే అప్పటికే ఈ ఆఫర్‌ను యాక్టివేట్ చేసుకున్న పాత వినియోగదారుల పరిస్థితి ఏంటి? అనే దానిపై ఎయిర్‌టెల్ క్లారిటీ ఇచ్చింది.

పాత వినియోగదారులకు హెచ్చరిక!

జనవరి 16 లోపు ఎవరైతే ఈ ప్లాన్‌ ను యాక్టివేట్ చేసుకున్నారో.. వారు ఏడాది పాటు ఈ సేవలను ఉచితంగా పొందవచ్చు. కానీ, ఇక్కడే ఒక చిన్న తిరకాసు ఉంది. సేవలను కొనసాగించాలంటే 'బిల్లింగ్ డీటెయిల్స్' లేదా క్రెడిట్ కార్డ్ వివరాలు ఇవ్వాలని యాప్ అడుగుతోందని చాలా మంది వినియోగదారులు ఫిర్యాదు చేస్తున్నారు. ఇలా వివరాలు ఇస్తే.. ఒక ఏడాది ముగిసిన తర్వాత మీ అనుమతి లేకుండానే ఆటోమేటిక్‌ గా డబ్బులు కట్ అయ్యే (Auto-renewal) ప్రమాదం ఉంది. కాబట్టి సబ్‌స్క్రిప్షన్ సెట్టింగ్స్‌ ను ఒకసారి చెక్ చేసుకుని, ఏడాది పూర్తి కాకముందే దాన్ని క్యాన్సిల్ చేయడం మంచిది.

పర్‌ప్లెక్సిటీ పోయింది.. అడోబ్ వచ్చింది!

పర్‌ప్లెక్సిటీతో భాగస్వామ్యం ముగియడంతో.. ఎయిర్ టెల్ (Airtel) తమ యూజర్ల కోసం మరో కొత్త ఆఫర్‌ ను తీసుకొచ్చింది. ఇప్పుడు ఎయిర్‌టెల్ ప్రిపెయిడ్, పోస్ట్‌పెయిడ్ , బ్రాడ్‌బ్యాండ్ వినియోగదారులందరికీ 'అడోబ్ ఎక్స్‌ప్రెస్ ప్రీమియం' (Adobe Express Premium) సబ్‌స్క్రిప్షన్ 12 నెలల పాటు ఉచితంగా లభిస్తుంది. దీని విలువ మార్కెట్లో సుమారు రూ. 4,000 వరకు ఉంటుంది. ఫోటో ఎడిటింగ్ , డిజైనింగ్ ఇష్టపడే వారికి ఇది మంచి ప్రత్యామ్నాయం అని చెప్పవచ్చు.

ఎయిర్‌టెల్ ఎందుకు వెనక్కి తగ్గింది?

భారతదేశంలో ఏఐ (AI) వినియోగం వేగంగా పెరుగుతోంది. ఈ క్రమంలో వ్యయ నియంత్రణ లేదా మారుతున్న బిజినెస్ వ్యూహాల వల్ల ఎయిర్‌టెల్ ఈ నిర్ణయం తీసుకున్నట్లు విశ్లేషకులు భావిస్తున్నారు. రూ. 17,000 విలువైన సబ్‌స్క్రిప్షన్‌ ను కోట్లాది మందికి ఉచితంగా ఇవ్వడం కంపెనీపై ఆర్థిక భారాన్ని పెంచే అవకాశం ఉండవచ్చు. ఏది ఏమైనా ఉచిత ప్లాన్ ఆశించిన వారికి ఇది నిరాశ కలిగించే వార్తే.

మొత్తంగా చెప్పాలంటే, మీరు ఇప్పటికే పర్‌ప్లెక్సిటీ ప్రో వాడుతుంటే మీ అకౌంట్ సెట్టింగ్స్ జాగ్రత్తగా చూసుకోండి. కొత్తగా ఏదైనా ఆఫర్ కావాలనుకుంటే ఎయిర్‌టెల్ థాంక్స్ యాప్‌ లో అడోబ్ ఎక్స్‌ప్రెస్ ప్లాన్‌ను క్లెయిమ్ చేసుకోండి.