airtel: వ్యాలిడిటీ ముగిసినా అపరిమితకాల్స్, డేటా.. ఎయిర్‌టెల్ సంచలన ఆఫర్.. వారికి మాత్రమే..

Wayanad News: కేరళలోని వాయనాడ్‌లో ప్రకృతి సృష్టించిన విలయతాండవానికి ప్రజలు అల్లాడిపోతున్నారు. కొండచరియలు విరిగిపడటంతో దాదాపు 150 మంది ప్రాణాలు కోల్పోయినట్లు వార్తలు వస్తున్నాయి. ఈ పరిస్థితుల్లో వారికి బాసటగా నిలిచేందుకు ప్రముఖ టెలికాం దిగ్గజం ఎయిర్‌టెల్ ముందుకు వచ్చింది.

ఈ ఘటన వల్ల ప్రభావితమైన వారి కోసం భారతీ ఎయిర్‌టెల్ సహాయక చర్యలను ప్రారంభించింది. తమ నెట్‌వర్క్‌లో ప్రీపెయిడ్ సహా పోస్ట్ వినియోగదారులకు తక్షణ సహాయాన్ని ప్రకటించింది. వాయనాడ్ ప్రాంతంలోని ప్రీపెయిడ్ బాధితులకు వ్యాలిడిటీ ముగిసినా మరో 3 రోజుల పాటు అపరిమిత కాలింగ్, రోజూ 1 GB డేటాతో పాటు 100 ఉచిత SMSల ప్రయోజనం కల్పిస్తున్నట్లు చెప్పింది.

ఇక పోస్ట్ పెయిడ్ వినియోగదారులు బిల్లు చెల్లించేందుకు అదనపు సమయం ఇస్తున్నట్లు వెల్లడించింది. మరో 30 రోజుల అనంతరం 2 నెలల బిల్లు కలిపి పే చేయవచ్చని స్పష్టం చేసింది. క్లిష్ట సమయంలో మొబైల్ సేవలకు అంతరాయం లేకుండా బాధితులు తమ బంధువులతో కనెక్ట్ అయి ఉండేందుకు ఈ మేరకు యాక్సెస్ ఇచ్చినట్లు పేర్కొంది.

కేవలం టెలికమ్యూనికేషన్స్ సాయం మాత్రమే కాకుండా స్థానికంగా సహాయ చర్యల్లోనూ చురుకుగా పాలుపంచుకుంటోంది. కేరళ వ్యాప్తంగా ఉన్న తన 52 రిటైల్ స్టోర్లను రిలీఫ్ మెటీరియల్స్ కోసం కలెక్షన్ పాయింట్లుగా మార్చింది. వాయనాడ్‌లోని బాధిత వర్గాలకు పంపిణీ చేయడానికి అవసరమైన సామాగ్రిని సేకరించి స్థానిక ప్రభుత్వాలకు అందజేస్తోంది. ఈ విపత్కర పరిస్థితుల్లో ఎయిర్‌టెల్ చేస్తున్న సాయంపై ప్రశంసలు వెల్లువెత్తుతున్నాయి.