వరుసగా మూడో నెల జియోకు ఎయిర్‌టెల్ షాక్: వీఐ, బీఎస్ఎన్‌ఎల్ డౌన్

2016లో ఆరంగేట్రం నుండి దూసుకెళ్తున్న జియోకు ఎయిర్‌టెల్ వరుసగా మూడో నెల షాకిచ్చింది. టాప్‌లో ఉన్న వొడాఫోన్ ఐడియా, రెండో స్థానంలో ఉన్న ఎయిర్‌టెల్‌ను వెనక్కి నెట్టి అతికొద్ది కాలంలోనే అగ్రస్థానంలో నిలిచింది రిలయన్స్ జియో. గత కొద్దికాలంగా ఎయిర్‌టెల్‌కు కొత్త యూజర్లు పెరుగుతుండగా, వొడాఫోన్ ఐడియాకు మాత్రం తగ్గుతూనే ఉన్నారు. ఇప్పుడు జియో మొదటి స్థానంలో ఉండగా, ఎయిర్‌టెల్ రెండో స్థానంలో ఉన్నాయి. మూడు నెలల క్రితం వరకు జియో యూజర్లు భారీగా పెరిగారు. అయితే వరుసగా మూడు నెలల నుండి కొత్త యూజర్లలో జియోను ఎయిర్ టెల్ బీట్ చేసింది.

జియోను మళ్లీ దాటిన ఎయిర్‌టెల్

టెలికం రెగ్యులేటరీ అథారిటీ ఆఫ్ ఇండియా(TRAI) ప్రకారం అక్టోబర్ నెలలో కూడా జియోను అధిగమించిన ఎయిర్ టెల్ 36.7 లక్షల మంది కొత్త వైర్‍‌లెస్ యూజర్లు జత కలిశారు. జియో కంటే ఎయిర్‌టెల్‌కు 14.5 లక్షల మంది ఎక్కువగా సబ్‌స్క్రైబ్ అయ్యారు. జియోకు కొత్తగా సబ్‌స్క్రైబ్ అయిన వారి సంఖ్య 22.5 లక్షలు. అలాగే, ఎయిర్‌టెల్ నెట్ వర్క్‌లో 96.74 శాతం క్రియాశీల చందాదారులు ఉన్నారు.

జియో, ఎయిర్‌టెల్ చందాదారులు ఎంతంటే

అక్టోబర్ నాటికి ఎయిర్‌టెల్ చందాదారులు 33.028 కోట్లకు చేరుకున్నారు. సెప్టెంబర్‌లో ఈ సంఖ్య 32.666 కోట్లుగా ఉంది. నెల రోజుల్లోనే 36.7 లక్షల మంది జత కావడం ఏ టెల్కోకు అయినా ఇదే పెద్దది. ఇక, సెప్టెంబర్ నెలలో 40.412 కోట్లుగా ఉన్న జియో కస్టమర్లు అక్టోబర్ ముగిసే నాటికి 40.635 కోట్లుగా నమోదయింది.

వీఐ, బీఎస్ఎన్ఎల్ డౌన్

ఎయిర్‌టెల్, జియోకు చందాదారులు పెరగగా, వొడాఫోన్ ఐడియాకు 26.50 లక్షలమంది తగ్గారు. దీంతో వొడాఫోన్ ఐడియా యూజర్ల సంఖ్య సెప్టెంబర్‌లోని 29.549 కోట్ల నుండి అక్టోబర్ నాటికి 29.283 కోట్లకు తగ్గింది. భారత్ సంచార్ నిగమ్ లిమిటెడ్(BSNL) సబ్‌స్క్రైబర్స్ సంఖ్య కూడా 10,215 తగ్గి 11.888 కోట్లకు చేరింది.