AirIndia: ఎయిర్ ఇండియాలో మరో కొత్త మార్పు.. సినీతారల డిజైనర్‌తో డీల్ ఫిక్స్

AirIndia dresscode: ప్రభుత్వం నుంచి టాటాల చేతికి వచ్చిన అనంతరం ఎయిర్ ఇండియాలో వివిధ మార్పులు జరిగాయి. లోగో, డిజైన్ దగ్గర నుంచి విమానాల రంగు వరకు అన్నింటిలో టాటా కంపెనీ వైవిధ్యం చూపిస్తోంది. తాజాగా స్టాఫ్ డ్రెస్ కోడ్‌లోనూ పలు మార్పులకు శ్రీకారం చుట్టింది.

తన పైలట్లు మరియు సిబ్బంది కోసం కొత్త యూనిఫాంలను ఎయిర్ ఇండియా తాజాగా విడుదల చేసింది. 1932లో సంస్థను స్థాపించినప్పటి నుంచి 6 దశాబ్దాల కాలంలో సిబ్బంది డ్రెస్ కోడ్ మార్చడం ఇదే మొదటిసారి కావడం విశేషం. ఈ ఏడాది చివరి నాటికి కొత్త యూనిఫాంలో స్టాఫ్ సందడి చేయనున్నట్లు తెలుస్తోంది. 'ఎయిరిండియా గొప్ప చరిత్ర మరియు ఉజ్వల భవిష్యత్తుకు ఇది వాగ్దానం' అని ఎయిర్‌లైన్ తన X ఖాతాలో పోస్ట్‌ చేసింది.

10 వేల మందికి పైగా విమాన స్టాఫ్, గ్రౌండ్ మరియు భద్రతా సిబ్బందికి ఎరుపు, వంకాయ మరియు బంగారు రంగులలో కొత్త యూనిఫామ్‌లను సిద్ధం చేయాలని ఎయిర్ ఇండియా నిర్ణయించింది. దీనిని రూపొందించడానికి ప్రముఖ ఫ్యాషన్ డిజైనర్ మనీష్ మల్హోత్రాను ఎంపిక చేసింది. 'విశ్వసనీయ, శక్తివంతమైన కొత్త భారతదేశానికి ఇది ప్రాతినిధ్యం వహిస్తుంది' అని తెలిపింది.

ఎయిర్ ఇండియా అధికారిక ఖాతా ద్వారా Xలో పోస్ట్ చేసిన వీడియోలో సిబ్బంది తాజా యూనిఫాంలు ధరించి కనిపించారు. 'మా కొత్త పైలట్ & క్యాబిన్ క్రూ యూనిఫామ్‌లను పరిచయం చేస్తున్నాము. ఈ యూనిఫాంలు భారతదేశపు ప్రముఖ డిజైనర్ మనీష్ మల్హోత్రా ద్వారా మూడు అత్యుత్తమ రంగుల్లో రూపొందిస్తున్నాం' అని అందులో పేర్కొంది.

'ఎయిర్ ఇండియా కోసం యూనిఫాంలను రూపొందించే అవకాశం లభించడం గౌరవంగా భావిస్తున్నాను. జాతీయ జెండాను మోసే సంస్థకు సేవలు అందించడం నాకు గర్వకారణం. ఈ విధంగా భారతీయ ఫ్యాషన్ సొగసు మరియు మనోజ్ఞతను ప్రదర్శించగలగడం విశేషం. దేశపు విభిన్న సంస్కృతి మరియు సంప్రదాయాల సారాంశంతో కూడిన యూనిఫాంలను రూపొందించడం నా లక్ష్యం' అని డిజైనర్ మనీష్ మల్హోత్రా తెలిపారు.