flight charges: ప్రయాణీకులకు ఎయిర్‌లైన్స్ పండుగ షాక్.. ఆ రూట్లలో 300 శాతం పెరిగిన ఛార్జీలు

flight charges: భారతదేశంలో పండుగలకు ప్రత్యేకత ఉంది. పలువురు వ్యాపారస్తులు, కంపెనీలు ఆఫర్స్ ప్రకటిస్తాయి. సాధారణం కంటే తక్కువ ధరకు ఆయా ఉత్పత్తుల్ని కొనుగోలు చేసేందుకు అవకాశం కల్పిస్తాయి. అయితే కేవలం ఒక్క రవాణా రంగం మాత్రం ఇందుకు పూర్తి భిన్నంగా వ్యవహరిస్తూ ఉంటుంది.

పండుగలు, శెలవులు వచ్చాయంటే చాలు ప్రయాణీకుల జేబులకు చిల్లు పడినట్లే. ఓ రేంజ్‌ లో ఛార్జీలు మోతమోగుతుంటాయి. త్వరలో రానున్న దీపావళి సమయంలో రేట్లు పెంచి సొమ్ము చేసుకునేందుకు ఎయిర్ లైన్స్ సంస్థలు కాచుకు కూర్చున్నాయి. భారీగా ఏర్పడిన డిమాండ్ కారణంగా విమాన ఛార్జీలు అకస్మాత్తుగా పెరిగిపోయి ఆకాశాన్ని అంటుతున్నాయి.

ఈ ఏడాది నమోదైన డేటా ప్రకారం.. ఈ పండుగ సీజన్‌ లో విమాన ఛార్జీల ధరలు విపరీతంగా పెరిగాయి. సాధారణం కంటే 282 శాతం అధికమయ్యాయి. ఇక కొన్ని ప్రసిద్ధ రూట్లలో అయితే దొరికినంత దోచుకోవడమే అన్నట్లు తయారైంది పరిస్థితి. కేవలం మెట్రో సిటీస్ మాత్రమే కాకుండా టైర్ 1, 2, 3 నగరాల విషయంలోనూ ఇదే ట్రెండ్ కొనసాగుతోంది.

అహ్మదాబాద్ నుంచి కొచ్చికి డైరెక్ట్ ఫ్లైట్ కోసం రిటర్న్ టిక్కెట్ ధర నమ్మశక్యం కాని రేంజ్ కి చేరింది. ఈ రూట్ లో ప్రయాణం చేయాలంటే 57 వేలు వెచ్చించాల్సిందే. ఈశాన్య ప్రాంతాలకు వెళ్లే విమానాలను అనుసంధానించే బాగ్డోగ్రాకు టిక్కెట్ ధర 45 వేలుగా ఉంది. వారం ముందుగా బుక్ చేసుకుంటే చండీగఢ్‌కి రిటర్న్ టిక్కెట్ ధర 10 వేలు తక్కువగా ఉన్నట్లు తెలుస్తోంది.