FMCG లో సీనియర్ ఉద్యోగాలకు బదులుగా AI బాధ్యతలు చేపడుతోంది

2025 ఆర్థిక సంవత్సరంలో భారత FMCG కంపెనీల్లో ఉద్యోగాల కోతలు కనిపిస్తున్నాయి. ముఖ్యంగా హిందుస్తాన్ యూనిలీవర్ (HUL), డాబర్, గోడ్రేజ్ కన్జ్యూమర్ ప్రాడక్ట్స్ వంటి ప్రముఖ కంపెనీలు సీనియర్ స్థాయి ఉద్యోగాల్లో సుమారుగా 25% వరకు కోతలు పెట్టాయి. మొత్తం ఉద్యోగుల సంఖ్యలో 9% నుంచి 10% వరకూ తగ్గుదల నమోదైంది. మార్కెట్ వృద్ధి మందగమనం, ఖర్చులు తగ్గించేందుకు సంస్థలు తీసుకున్న చర్యల కారణంగా ఈ మార్పులు చోటు చేసుకున్నట్లు భావిస్తున్నారు.

2025లో భారతదేశంలోని ప్రముఖ FMCG కంపెనీల్లో ఉద్యోగాల తగ్గింపు స్పష్టంగా కనిపిస్తోంది. హిందుస్థాన్ యూనిలీవర్ (HUL) సంస్థలో ఉద్యోగుల సంఖ్య 7,215 నుంచి 6,604కి తగ్గి సుమారుగా 8.5% కోత చోటు చేసుకుంది. ఇదే విధంగా డాబూర్ ఇండియా, గోద్రేజ్ కన్స్యూమర్ ప్రొడక్ట్స్ వంటి కంపెనీల్లో 6% నుంచి 13% వరకు ఉద్యోగుల తగ్గింపు జరిగింది. నెస్ట్లే ఇండియా, ఎమామి వంటి సంస్థలు కూడా తక్కువ మంది ఉద్యోగులతో కొనసాగుతున్నాయి. ఈ మార్పుల వెనక ప్రధాన కారణాలు ఖర్చుల నియంత్రణ, ఆటోమేషన్ వలన మారుతున్న పని విధానాలు, అలాగే మార్కెట్ వృద్ధిలో మందగమనం కావచ్చని పరిశ్రమ వర్గాలు చెబుతున్నాయి. అంతర్జాతీయంగా కూడా ఈ ప్రభావం కనిపిస్తోంది. ప్రోక్టర్ అండ్ గాంబుల్ (P&G) సంస్థ ప్రపంచవ్యాప్తంగా దాదాపు 7,000 ఉద్యోగాలను తగ్గించనున్నట్లు ప్రకటించింది, ఇది సుమారు 6% ఉద్యోగ కోతగా భావించవచ్చు. మొత్తంగా, గ్లోబల్ మరియు ఇండియన్ FMCG రంగంలో ఉద్యోగాల పరిస్థితి కొద్దిగా కలవరపెడుతోంది.

ఈ సంస్థలు, సీనియర్ స్థాయి ఉద్యోగాల సంఖ్యను తగ్గించాయి. బ్రాండ్ మేనేజర్లు, కేటగరీ హెడ్‌లు, సప్లై చైన్ మేనేజర్ల వంటి ముఖ్యమైన పాత్రల్లో కోతలు వేశారు. అయితే ఇదే సమయంలో కొత్త రంగాల్లో ఉద్యోగ అవకాశాలు పెరుగుతున్నాయి. డిజిటల్ మార్కెటింగ్, ఈ-కామర్స్, డేటా అనలిటిక్స్, సోషల్ కామర్స్ వంటి రంగాల్లో ఎంట్రీ లెవెల్ ఉద్యోగాల్లో 5%-8% వృద్ధి కనిపిస్తోంది.

కొత్తగా కంపెనీలు సస్టెయినబిలిటీ, కస్టమర్ ఇన్సైట్స్, మరియు టెక్నాలజీ ఆధారిత మేనేజ్‌మెంట్ స్కిల్స్ ఉన్నవారిని ఎంచుకుంటున్నాయి. అందువల్ల, బయట నుంచి నిపుణులను తీసుకొచ్చే ధోరణి పెరుగుతోంది. నాయకత్వ మార్పులు కూడా ఈ కాలంలో చోటు చేసుకున్నాయి. ఉదాహరణకి, HULలో ప్రియా నాయర్ CEOగా, నెస్ట్లే ఇండియాలో మనీష్ తివారి MDగా నియమితులయ్యారు.

Hiring (ఉద్యోగ నియామకాలు) విషయానికి వస్తే, ప్రస్తుతం మధ్యస్థాయి, సీనియర్ స్థాయిల్లో నియామకాలు కొంత మందగించాయి. కానీ పండుగ సీజన్ లేదా గ్రామీణ డిమాండ్ పెరిగితే, ఈ పరిస్థితి కొంత మెరుగవవచ్చు. ఇప్పటి కంపెనీలు నైపుణ్యాలు ఉన్నవారిని ఎంపిక చేయడంపై దృష్టిపెడుతున్నాయి.

ఇక AI ప్రభావం స్పష్టంగా కనిపిస్తోంది. మార్కెటింగ్, డేటా అనలిటిక్స్ వంటి విభాగాల్లో AI వలన పనులు ఆటోమేటెడ్ అవుతున్నాయి, దాంతో కొన్ని రోల్స్ అవసరం తక్కువ అవుతోంది.

ముఖ్యంగా ఆర్టిఫిషియల్ ఇంటెలిజెన్స్ (AI) ఆధారిత డేటా అనలిటిక్స్, ప్రిడిక్టివ్ కన్స్యూమర్ టూల్స్ వంటివి వినియోగదారుల అభిరుచులు, ప్రాధాన్యతలు ముందుగానే అర్థం చేసుకునేందుకు ఉపయోగిస్తున్నాయి. అంతేకాదు, సప్లై చైన్, మార్కెటింగ్, అనలిటిక్స్ వంటి కీలక విభాగాల్లో ఆపరేషన్లను ఆటోమేషన్ ద్వారా మెరుగు పరుస్తున్నాయి. సంస్థలు AI ఆధారంగా నాయకత్వ వ్యవస్థను మరింత శక్తివంతంగా తీర్చిదిద్దేందుకు దృష్టి సారిస్తున్నాయి. మార్చుకుంటున్న మార్కెట్ పరిస్థితుల మధ్య, టెక్నాలజీతో ముందడుగు వేస్తున్న ఈ సంస్థలు భవిష్యత్‌కు సిద్ధమవుతున్నాయి.