Hyderabad: హైదరాబాద్ ఐటీ హబ్‌లో AI నిఘా! ఈ 15 కారిడార్లలో ట్రాఫిక్ జామ్ ఇక చిటికెలో క్లియర్!

హైదరాబాద్ (Hyderabad) ఐటీ కారిడార్‌లో ప్రయాణం అంటేనే ఒక యుద్ధం. దుర్గం చెరువు కేబుల్ బ్రిడ్జి మీద నుంచి గచ్చిబౌలి వెళ్లాలన్నా, జేఎన్టీయూ నుంచి సైబర్ టవర్స్ దాటాలన్నా గంటల కొద్దీ సమయం పడుతుంది. అయితే ఈ ట్రాఫిక్ చిక్కుముడిని విప్పడానికి సైబరాబాద్ పోలీసులు ఇప్పుడు AI (Artificial Intelligence) అస్త్రాన్ని ప్రయోగించారు. 15 కీలక ప్రాంతాల్లో అమర్చిన స్మార్ట్ కెమెరాల ద్వారా ట్రాఫిక్ రద్దీని రియల్ టైమ్‌లో పర్యవేక్షిస్తున్నారు.

ఎక్కడెక్కడ నిఘా ఉంది?

ముఖ్యంగా ఐటీ హబ్‌లోకి ప్రవేశించే 15 ప్రధాన ఎంట్రీ పాయింట్ల వద్ద ఈ AI ప్లాట్‌ఫామ్ పనిచేస్తోంది. షేక్‌పేట్-ఖజాగూడ, లె మెరిడియన్-కొండాపూర్, జేఎన్టీయూ-సైబర్ టవర్స్ వంటి అత్యంత రద్దీ ప్రాంతాల్లో ట్రాఫిక్ ఎలా ఉందో ఈ సిస్టమ్ నిమిష నిమిషానికి విశ్లేషిస్తుంది. ఎక్కడ ఒత్తిడి పెరుగుతోంది, వాహనాలు ఎక్కడ ఆగిపోతున్నాయి అనే డేటాను ఇది వెంటనే కంట్రోల్ రూమ్‌కు చేరవేస్తుంది.

డేటా లెక్కలు చూస్తే కళ్లు చెదరాల్సిందే!

ఈ AI సిస్టమ్ బయటపెట్టిన గణాంకాలు చూస్తుంటే హైదరాబాద్ ట్రాఫిక్ ఏ స్థాయిలో ఉందో అర్థమవుతుంది. ఒక సాధారణ మంగళవారం సాయంత్రం 4 గంటలకే సుమారు 15 లక్షల వాహనాల కదలికలు సైబరాబాద్‌లోకి నమోదయ్యాయి. ఒక సగటు సోమవారం నాడు కేబుల్ బ్రిడ్జి నుంచి ఐకియా మధ్య 2.18 లక్షల వాహనాలు, షేక్‌పేట్-రాయదుర్గం మధ్య 2.22 లక్షల వాహనాల కదలికలు కనిపిస్తున్నాయి. ఇవి కేవలం నంబర్లు కాదు, రోడ్లపై ఉన్న విపరీతమైన ఒత్తిడికి నిదర్శనం.

వారంలో ఆ మూడు రోజులే అసలు పరీక్ష

చాలామంది వీకెండ్ ముగుస్తుంది కదా అని సోమవారం ట్రాఫిక్ గురించి భయపడతారు. కానీ AI డేటా ప్రకారం.. వారంలో మంగళ, బుధ, గురువారాల్లోనే ట్రాఫిక్ రద్దీ 20 శాతం ఎక్కువగా ఉంటోంది. అలాగే వాహనాల విషయానికి వస్తే 40 శాతం కార్లు, 40 శాతం టూ వీలర్లు రోడ్లను ముంచెత్తుతున్నాయి. వర్షాకాలం వచ్చిందంటే కార్ల వాడకం పెరిగి, ట్రాఫిక్ సమస్య మరింత జటిలంగా మారుతోందని అధికారులు గుర్తించారు.

కేవలం ట్రాఫిక్ మాత్రమే కాదు..

ఈ సిస్టమ్ కేవలం వాహనాలను లెక్కపెట్టడానికే కాదు, భవిష్యత్తులో నగరంలో నీరు నిలిచే ప్రాంతాలను (Waterlogging points) కూడా గుర్తించబోతోంది. దీనివల్ల వర్షం పడినప్పుడు ఏ రోడ్లో వెళ్తే సేఫ్ అనేది పోలీసులు ముందే చెప్పగలరు. అంతేకాకుండా, ట్రాఫిక్ రద్దీకి తగ్గట్టుగా సిగ్నల్ టైమింగ్ మార్చడం, వన్-వేలను సరిచేయడం వంటి నిర్ణయాలను ఈ రియల్ టైమ్ డేటా ఆధారంగా తీసుకుంటారు.

మొత్తానికి హైదరాబాద్ (Hyderabad) ప్రజల ప్రయాణాన్ని సులభతరం చేసేందుకు ఈ ఆర్టిఫిషియల్ ఇంటెలిజెన్స్ టెక్నాలజీ ఒక సంజీవనిలా మారబోతోంది. దీనివల్ల మీరు ఆఫీసుకి వెళ్లే సమయం తగ్గడమే కాకుండా, రోడ్లపై టెన్షన్ కూడా తగ్గుతుంది.