AI వల్లే కంపెనీ నుంచి వెళ్లిపోతున్నాం.. సంచలన వ్యాఖ్యలు చేసిన దిగ్గజ కంపెనీల సీఈఓలు..

ఆర్టిఫిషియల్ ఇంటెలిజెన్స్ (AI) సృష్టిస్తున్న ప్రకంపనలు కేవలం సాధారణ ఉద్యోగులకే కాక.. ప్రపంచ స్థాయి దిగ్గజ కంపెనీల సీఈఓల పదవులకు కూడా సవాలుగా మారుతున్నాయి. ఇప్పటివరకు ఏఐ వల్ల కేవలం ఎంట్రీ-లెవల్ ఉద్యోగాలే పోతాయని అందరూ భావించగా.. తాజా పరిణామాలు చూస్తుంటే కంపెనీల అత్యున్నత నాయకత్వంలో కూడా మార్పులు అనివార్యమని అర్థమవుతోంది. కోకా-కోలా సీఈఓ జేమ్స్ క్విన్సీ, వాల్‌మార్ట్ మాజీ సీఈఓ డగ్ మెక్‌మిలన్ వంటి దిగ్గజాలు తమ పదవుల నుండి తప్పుకోవడానికి ఏఐ విప్లవమే ప్రధాన కారణమని వెల్లడించడం పారిశ్రామిక వర్గాల్లో ఇప్పుడు తీవ్ర చర్చనీయాంశమైంది.

కోకా-కోలా పగ్గాలను 2017 నుండి చేపట్టిన జేమ్స్ క్విన్సీ.. ఈ నెల చివరలో తన బాధ్యతలను హెన్రిక్ బ్రాన్‌కు అప్పగించనున్నారు. ఏఐ, జెనరేటివ్ ఏఐ (Gen-AI) రాకతో వ్యాపార నిర్వహణలో ఒక భారీ మార్పు వస్తోందని.. ఈ కొత్త దశను నడిపించడానికి సరికొత్త శక్తి, భిన్నమైన ఆలోచనా దృక్పథం ఉన్న నాయకత్వం అవసరమని ఆయన అభిప్రాయపడ్డారు. తన హయాంలో కంపెనీ పురోగతి సాధించినప్పటికీ.. రాబోయే డిజిటల్ పరివర్తనను పూర్తి స్థాయిలో నిర్వహించడానికి కొత్త తరం నాయకులే సరైన వారని ఆయన స్పష్టం చేశారు.

అదేవిధంగా వాల్‌మార్ట్ మాజీ సీఈఓ డగ్ మెక్‌మిలన్ కూడా ఇదే తరహా అభిప్రాయాన్ని వ్యక్తం చేశారు. ఏఐ ఆధారిత ఏజెంటిక్ కామర్స్, భవిష్యత్తు షాపింగ్ విధానాలను తాను పూర్తిగా అర్థం చేసుకోలేకపోతున్నానని, ఈ మార్పులను ప్రారంభించగలనే తప్ప పూర్తి చేయలేనని ఆయన నిజాయితీగా ఒప్పుకున్నారు. సాంకేతికత ఇంత వేగంగా మారుతున్న తరుణంలో, ఆ మార్పును అందిపుచ్చుకోగల వారికి బాధ్యతలు అప్పగించడమే సంస్థకు శ్రేయస్కరమని ఆయన భావించారు.

కుప్పకూలిన భారత ఐటీ స్టాక్స్.. కొంపలు ముంచిన ఎన్విడియా AI ప్రకటన.. ఆందోళనలో ఇన్వెస్టర్లు..

అయితే, ఉన్నత స్థాయి అధికారుల పరిస్థితి ఇలా ఉంటే.. ప్రారంభ స్థాయి (Entry-level) ఉద్యోగుల భవిష్యత్తు మరింత ఆందోళనకరంగా ఉంది. ఆంత్రోపిక్ సీఈఓ డారియో అమోడెయ్ హెచ్చరికల ప్రకారం, రాబోయే ఐదేళ్లలో వైట్-కాలర్ ఉద్యోగాలలో సగం ఏఐ వల్ల తుడిచిపెట్టుకుపోయే ప్రమాదం ఉంది. ముఖ్యంగా న్యాయ సంస్థలు, కన్సల్టింగ్, ఫైనాన్స్, అడ్మినిస్ట్రేషన్ రంగాలలో జరిగే పునరావృత పనులను ఏఐ అత్యంత సమర్థవంతంగా చేయగలదు. ఉదాహరణకు, గతంలో జూనియర్ లాయర్లు చేసే డాక్యుమెంట్ రివ్యూ వంటి పనులను ఇప్పుడు ఏఐ సెకన్ల వ్యవధిలో పూర్తి చేస్తోంది. కంపెనీలు తమ ఖర్చులను తగ్గించుకోవడానికి తక్కువ మందిని నియమించుకోవాలని చూస్తుండటం ఈ ప్రమాదాన్ని మరింత పెంచుతోంది.

'ఏఐ గాడ్‌ఫాదర్'గా పిలువబడే జెఫ్రీ హింటన్ కూడా ఇవే ఆందోళనలను వ్యక్తం చేశారు. ఏఐ వల్ల కంపెనీల లాభాలు మునుపెన్నడూ లేనంతగా పెరుగుతాయని, కానీ అదే సమయంలో నిరుద్యోగిత విపత్కర స్థాయికి చేరుకునే అవకాశం ఉందని ఆయన హెచ్చరించారు. ఏదేమైనా ఏఐ అనేది కేవలం ఒక సాంకేతిక మార్పు మాత్రమే కాదు, ఇది ప్రపంచ ఉపాధి ముఖచిత్రాన్ని, నాయకత్వ శైలిని పూర్తిగా మార్చివేసే ఒక మహా విప్లవం అని స్పష్టమవుతోంది.