ఎల్ఐసీ ఐపీవోకు ముందు కీలక నిర్ణయం, ఆ సభ్యుల భర్తీ పూర్తి

లైఫ్ ఇన్సురెన్స్ కార్పోరేషన్ ఆఫ్ ఇండియా(LIC) ఐపీవోకు ముందు కీలక నిర్ణయం! ఎల్ఐసీ ఐపీవోకు అడుగులు వేగంగా పడుతున్నాయి. త్వరలో సెబికి డ్రాఫ్ట్ పంపించనుంది ప్రభుత్వం. ఇలాంటి సమయంలో కార్పోరేట్ గవర్నెన్స్ నిబంధనలను చేరుకోవడంలో భాగంగా కొత్తగా ఆరుగురు స్వతంత్ర డైరెక్టర్లను ఎల్ఐసీ తన బోర్డులో నియమించుకుంది. గత నెలలో ఈ ప్రక్రియను పూర్తిచేసినట్లుగా తెలుస్తోంది. సెబికి డ్రాఫ్ట్ సమర్పించడానికి ముందు కార్పోరేట్ గవర్నెన్స్ నిబంధనలు చేరుకోవడం ముఖ్యం. అందుకే ఈ నియామకాలను చేపట్టింది.

మాజీ ఫైనాన్షియల్ సర్వీసెస్ సెక్రటరీ అంజులీ చిబ్ దుగ్గల్, సెబి మాజీ సభ్యులు జీ మహాలింగం, మాజీ ఎస్బీఐ లైఫ్ మేనేజింగ్ డైరెక్టర్ సంజీవ్ నుతియాల్ ఉన్నారని తెలుస్తోంది. వీరితో పాటు చార్టర్డ్ అకౌంటెంట్ ఎంప విజయ్ కుమార్, రాజ్ కమల్, వీఎస్ పార్థసారథిలను కూడా డైరెక్టర్లుగా నియమించింది ఎల్ఐసీ బోర్డు. కొత్తగా ఆరుగురు జత చేరడంతో మొత్తం 9 మంది డైరెక్టర్లు అయ్యారు. అన్ని ఖాళీలు పూర్తయ్యాయి.

ఈ వారంలో ఐపీవో కోసం సెబికి దరఖాస్తు చేయనున్నట్లు దీపమ్ కార్యదర్శి తుహిన్‌కాంత పాండే ఇదివరకే తెలిపారు. ఎల్ఐసీ వ్యాల్యూ రూ.5 లక్షల కోట్లుగా తేల్చారు. ఐపీవో తర్వాత రిలయన్స్ ఇండస్ట్రీస్‌ను వెనక్కి నెడుతుందని అంచనా. ఎల్ఐసీ వాటాల విక్రయంలో పాలసీదారులకు పది శాతం కేటాయించనున్నారు.