Dividend: ఒక్కో షేరుకు రూ.100 డివిడెండ్.. మీ దగ్గర ఈ అగ్రోకెమికల్ స్టాక్ ఉందా..?

Dividend: రెండవ త్రైమాసికం ముగియటంతో అనేక కంపెనీలు వరుసగా తమ ఆర్థిక ఫలితాలను విడుదల చేయటంతో పాటు.. ఇన్వెస్టర్లకు డివిడెండ్, బోనస్ షేర్లను అందిస్తున్నాయి. తాజాగా అగ్రోకెమికల్ స్టాక్ అయిన బహుళజాతి సంస్థ, బేయర్ కూడా తన ఇన్వెస్టర్లకు మంచి బహుమతిని ప్రకటించింది.

కంపెనీ ప్రకటన..

దేశంలో పంట రక్షణలో బేయర్ అగ్రోకెమకల్స్ పరిశ్రమలో అగ్రగామిగా ఉంది. పంట సంరక్షణ, విత్తనాలు, పర్యావరణ శాస్త్రాల్లో కంపెనీకి మంచి గుర్తింపు ఉంది. తాజాగా ఫలితాలు విడుదల చేసిన కంపెనీ ఒక్కో షేరుకు రూ.100 మధ్యంతర డివిడెండ్‌ను ప్రకటించింది. దీనికి సంబంధించిన కంపెనీ బోర్డు డైరెక్టర్లు నవంబర్ 09న డైరెక్టర్ల సమావేశంలో నిర్ణయించినట్లు సెబీకి తెలిపింది. దీనికి ఈనెల 19ని రికార్డు తేదీగా కంపెనీ నిర్ణయించింది. షేర్‌హోల్డర్‌లకు డిసెంబర్ 08న డివిడెండ్ బదిలీ చేయబడుతుందని కంపెనీ తెలిపింది.

షేరు ధర వివరాలు..

ప్రస్తుతం కంపెనీ మార్కెట్ క్యాప్ రూ. 21,344.80 కోట్లుగా ఉంది. ఈ ఆర్థిక సంవత్సరం రెండవ త్రైమాసికంలో కంపెనీ లాభం రూ.162.6 కోట్లుగా నమోదైంది. గత సంవత్సరం ఇదే కాలానికి కంపెనీ లాభం రూ.154.1 కోట్లుగా ఉంది. ఈ కాలంలో లాభాల్లో 5.51 శాతం వృద్ధి నమోదైంది. ఈ రోజు ఉదయం 11 గంటల సమయంలో బేయర్ స్టాక్ ధర ఎన్ఎస్ఈలో రూ.4,735 వద్ద ట్రేడ్ అవుతోంది. షేర్ 52 వారాల గరిష్ఠ ధర రూ.5,667.75 వద్ద ఉండగా.. 52 వారాల కనిష్ఠ ధర రూ.4,218.05గా ఉంది

కంపెనీ వ్యాపారం..

ఆవాలు, మినుము, పత్తి, జొన్న విత్తనాలతో కూడిన విత్తనాల పంపిణీ పోర్ట్‌ఫోలియోలో కొంత భాగాన్ని 2021-22 ఆర్థిక సంవత్సరం క్యూ3లో విక్రయించినట్లు ప్రకటించింది. 1953లో స్థాపించబడిన కంపెనీ అనేక సబ్సిడరీ కంపెనీలకు కలిగి ఉంది. ప్రపంచ వ్యాప్తంగా 150 ఏళ్ల ప్రస్థానం కలిగి ఉన్న కంపెనీలో 125 సంవత్సరాలకు పైగా వ్యాపారాన్ని నిర్వహిస్తోంది. దేశంలో కంపెనీ మెుత్తం 13,000 మంది ఉద్యోగులను కలిగి ఉంది. అలాగే ఆరు తయారీ యూనిట్లతో పాటు 3 రీసెర్చ్ అండ్ డెవలప్ మెంట్ కేంద్రాలను కలిగి ఉంది. దేశంలో ఫార్మసుటికల్స్ విభాగాన్ని Bayer Zydus పేరుతో నిర్వహిస్తోంది.