Pakistan News: పాకిస్తాన్‌పై ADB దారుణమైన రిపోర్ట్.. ఆసియాలోనే అత్యంత హీనస్థితికి దాయాది దేశం

Asia Development Bank: కరోనా అనంతరం వివిధ దేశాలు తీవ్ర సంక్షోభంలోకి చిక్కుకుపోయాయి. విపరీతంగా పెరిగిన ద్రవ్యోల్బణం ఆయా దేశాలను దివాళా అంచుకు తీసుకువెళ్లింది. చైనాను నమ్మిన దాయాది దేశం పాకిస్తాన్‌ రుణభారంతో కొట్టుమిట్టాడుతోంది. దీనికితోడు ద్రవ్యోల్బణమూ తోడు కావడంతో ప్రజాజీవనం అస్తవ్యస్తమవుతోంది.

25 శాతం ద్రవ్యోల్బణం రేటుతో ఆసియా మొత్తం మీద పాకిస్తాన్‌ అత్యధిక జీవన వ్యయాన్ని కలిగి ఉన్నట్లు ఆసియా డెవలప్‌మెంట్ బ్యాంక్ (ADB) నివేదించింది. దాని ఆర్థిక వ్యవస్థ 1.9 శాతంతో ఈ ప్రాంతంలో నాల్గవ అత్యల్ప వేగంతో వృద్ధి చెందుతున్నట్లు పేర్కొంది. ఈ మేరకు ADB తన నివేదికను మనీలాలో విడుదల చేసింది.

వచ్చే ఆర్థిక సంవత్సరానికి పాకిస్తాన్‌ ద్రవ్యోల్బణం రేటును 15 శాతంగా ADB అంచనా వేస్తోంది. 46 దేశాలలో మరోసారి ఇదే అత్యధిక రేటు కావడం గమనార్హం. 2024-25 ఆర్థిక సంవత్సరానికి సంబంధించి ఐదవ అత్యల్ప వృద్ధి రేటు 2.8 శాతాన్ని నమోదు చేయనున్నట్లు స్పష్టం చేసింది. గతంలో పాకిస్తాన్‌ దక్షిణాసియాలో అత్యధిక జీవన వ్యయం కలిగి ఉన్న దేశం కాగా ఇప్పుడు యావత్ ఆసియాలో అత్యంత ఖరీదైనదిగా మారింది.

స్టేట్ బ్యాంక్ ఆఫ్ పాకిస్తాన్‌ (SBP) మరియు ఫెడరల్ ప్రభుత్వం ఈ ఆర్థిక సంవత్సరానికి ద్రవ్యోల్బణ లక్ష్యాన్ని 21 శాతంగా నిర్దేశించాయి. పొరుగు దేశం చాలా కాలం పాటు స్తబ్దత దశలో ఉంది. ఇప్పటికే దాదాపు 98 మిలియన్ల మంది పేదలుగా జీవిస్తున్నారు. కాగా మరో 10 మిలియన్ల మంది ప్రజలు మరింత పేదరికంలో కూరుకుపోనున్నట్లు ప్రకటించి ప్రపంచ బ్యాంక్ గత వారం షాక్ ఇచ్చింది.