Adani Group: టాటా-అంబానీలతో పోటీకి అదానీ ప్లాన్.. మూడు కంపెనీల కొనుగోలుకు సిద్ధం..

Adani Wilmar: భారతీయ వ్యాపారవేత్త గౌతమ్ అదానీ ఏ రంగంలో అడుగుపెట్టినా దానిని లాభదాయకమైనదిగా మార్చేందుకు తీవ్రంగా కృషిచేస్తారని తెలిసిందే. ఇన్నాళ్లు పవర్, మౌలికసదుపాయాలు, ఓడరేవులపై ఉన్న ఆయన దృష్టి ఒక్కసారిగా ఎఫ్ఎంసీజీ వ్యాపారంపై పడింది. దీంతో అంబానీ, టాటాలకు ధీటుగా ఈ రంగంలో ఎదిగేందుకు కొత్త కంపెనీల కొనుగోలుకు గౌతమ్ అదానీ ప్లాన్ చేస్తున్నారు.

ప్రస్తుతం అదానీ గ్రూప్ తన ఎఫ్ఎంసీజీ వ్యాపార పాదముద్రను వేగంగా విస్తరించాలని ప్లాన్ చేస్తోంది. ఈ వ్యాపారంలో తనదైన ముద్ర వేయడానికి గౌతమ్ అదానీ గ్రూప్ దాదాపు 1 బిలియన్ డాలర్లను వెచ్చించాలని యోచిస్తోంది. ఈ క్రమంలో బిలియనీర్ తన అదానీ విల్మార్ లిమిటెడ్ ద్వారా దేశంలోని దక్షిణ, తూర్పు ప్రాంతాల్లో వ్యాపారాన్ని మరింతగా విస్తరించేందుకు ప్రణాళికలు సిద్ధం చేస్తున్నారు. ఇందులో భాగంగా కంపెనీ మసాలా దినుసులు, రెడీ-టు-కుక్ ఫుడ్స్, ప్యాకేజ్డ్ గూడ్స్‌ వ్యాపారాల్లో ప్రత్యేకత కలిగిన మూడు బ్రాండ్లను కొనుగోలు చేసేందుకు చర్చలు జరుపుతోందని వార్తా నివేదికలు వస్తున్నాయి.

ప్రస్తుతం అదానీ విల్మార్.. ఫార్చ్యూన్ ఆయిల్, కోహినూర్ రైస్ వంటి ప్రసిద్ధ ఉత్పత్తులను కలిగిఉంది. అయితే కొన్ని నెలల కిందట అదానీ విల్మార్ తన కంపెనీలోని వాటాలను విక్రయించాలని చూసిన వార్త తెలిసిందే. అయితే ప్రస్తుత వ్యాపార విస్తరణను పరిశీలిస్తే మనసు మార్చుకున్నట్లు తెలుస్తోంది. ఎఫ్ఎంసీజీ రంగంలో పెరుగుతున్న డిమాండ్ దృష్టిలో ఉంచుకుని కంపెనీ వెనక్కి తిరిగినట్లు తెలుస్తోంది. ఈ క్రమంలో అదానీ విల్మార్ ఇటీవలి వార్షిక నివేదికలో దేశంలోనే అతిపెద్ద ఫుడ్ ఎఫ్‌ఎంసీజీ కంపెనీగా అవతరించే లక్ష్యంతో ప్యాకేజ్డ్ ఫుడ్ వ్యాపారంలోకి విస్తరించే అవకాశాలను అన్వేషిస్తున్నట్లు వ్యాపార వ్యూహాన్ని వెల్లడించింది.

ఈ చర్యతో రూ.6 లక్షల కోట్లు విలువైన భారతీయ ప్యాకేజ్డ్ ఫుడ్ మార్కెట్ పై అదానీ విల్మార్ తన ఫోకస్ పెట్టింది. గణనీయమైన వాటాను ఈ రంగంలో దక్కించుకునే లక్ష్యంతో ముందుకు సాగుతోంది. కంపెనీ దూకుడు విస్తరణ మధ్య కంపెనీ షేర్లు గత నవంబర్ నుంచి దాదాపు 27 శాతం లాభపడ్డాయి. క్యాష్ పొజిషన్ కూడా మెరుగుపడినట్లు కంపెనీ ప్రకటించింది. ఈ చర్యలు కంపెనీపై ఇన్వెస్టర్ల విశ్వాసాన్ని మరింతగా బలపరుస్తోంది. నేడు ఇంట్రాడేలో మధ్యాహ్నం 1.20 గంటల సమయంలో ఎన్ఎస్ఈలో 3.22 శాతం లాభపడి రూ.373.65గా కొనసాగుతోంది.