Adani News: గౌతమ్ అదానీ భారీ అచీవ్‌మెంట్‌.. మళ్లీ తొలిసారి కీలక స్థానానికి

Adani networth: దాదాపు గతేడాది మొత్తం ఒడిదుడుకుల మధ్య సాగిన అదానీ గ్రూప్ ప్రయాణం ఈ సంవత్సరం కొత్త పుంతలు తొక్కుతోంది. ప్రపంచవ్యాప్తంగా భారీ పెట్టుబడులను ఆకర్షిస్తూ తిరిగి కోల్పోయిన స్థానాన్ని సుస్థిరం చేసుకుంది. ఈ ప్రయాణంలో ఓ కీలక రికార్డు నెలకొల్పింది.

2023 ప్రారంభంలో అమెరికన్ షార్ట్ సెల్లర్ రిపోర్ట్ కారణంగా భారతీయ అదానీ గ్రూప్ సంక్షోభంలో కూరుకుపోయింది. తిరిగి ఏడాది తిరిగే సరికి గౌతమ్ అదానీ పోగొట్టుకున్న దాన్ని తిరిగి పొందారు. బుధవారం ఆయన సంపద నికర విలువ 100.7 బిలియన్ డాలర్లకు చేరుకుంది. హిండెన్‌బర్గ్ రీసెర్చ్ అనంతరం తొలిసారి మళ్లీ ఈ రికార్డు స్థాయిని టచ్ చేసింది.

ఆయన ఫ్లాగ్‌షిప్ కంపెనీ అదానీ ఎంటర్‌ప్రైజెస్ లిమిటెడ్ షేర్లు గత వారం 130 శాతం భారీ లాభాలను నమోదుచేశాయి. దీంతో బ్లూమ్‌బెర్గ్ బిలియనీర్స్ ఇండెక్స్ ప్రకారం ఆయన ఇప్పుడు ప్రపంచంలోని 12వ అత్యంత ధనవంతుడిగా అవతరించారు. 100 బిలియన్ డాలర్ల కంటే ఎక్కువ సంపద కలిగిన వ్యక్తుల ఎలైట్ క్లబ్‌కి తిరిగి రావడానికి అదానీ గ్రూప్ ఛైర్మన్‌కు సంవత్సరం పట్టింది. అయితే ఇప్పటికీ 2022లోని గరిష్ఠ స్థాయికి 50 బిలియన్ డాలర్ల దిగువనే ఉన్నారు.

ఆరోపణల అనంతరం అదానీ సంపద 80 బిలియన్ డాలర్లకు పైగా క్షీణించి కనిష్ట స్థాయి 37.7 బిలియన్ డాలర్లకు చేరింది. ఒక దశలో గ్రూప్ 150 బిలియన్ డాలర్ల కంటే ఎక్కువ మార్కెట్ విలువను కోల్పోయింది. రుణాలను తిరిగి చెల్లించడానికి మరియు నియంత్రణ సమస్యలను తగ్గించడానికి నెలల తరబడి పోరాడాల్సి వచ్చింది.