Adani-Hindenburg: హిండెన్‌బర్గ్ ఆరోపణలపై స్పందించిన అదానీ గ్రూప్.. పూర్తి వివరాలు..

Adani Group: దాదాపు 18 నెలలు గడిచినా ఇప్పటికీ అదానీ-హిండెన్‌బర్గ్ మధ్య పోరు కొనసాగుతూనే ఉంది. గత ఏడాది జనవరిలో తొలి నివేదిక తర్వాత అమెరికా షార్ట్ సెల్లర్ తాజాగా మరో కీలక ఆరోపణలతో ముందుకొచ్చింది. ఇది భారతీయ స్టాక్ మార్కెట్లలో పెద్ద సునామీని సృష్టించటానికి దారితీస్తోంది.

ఈ క్రమంలో అమెరికా సంస్థ చేసిన ఆరోపణలను అదానీ గ్రూప్ తిప్పికొట్టింది. హిండెన్‌బర్గ్ ఆరోపణలు పూర్తిగా హానికరమైవని, తప్పుదోవ పట్టిస్తున్నవి, మానిప్యులేటివ్ అంటూ కొట్టిపారేసింది. వాస్తవానికి 2023 మార్చిలో గౌరవనీయమైన సుప్రీం కోర్ట్ క్షుణ్ణంగా పరిశోధించి, కొట్టివేసిన కొన్ని ఆరోపణలను హిండెన్‌బర్గ్ తిరిగి రీసైక్లింగ్ చేసిందంటూ అదానీ గ్రూప్ పేర్కొంది. తమ విదేశీ హోల్డింగ్ నిర్మాణం పూర్తిగా పారదర్శకంగా ఉన్నాయని అదానీ గ్రూప్ ప్రతినిధి నేడు ప్రకటించారు. అలాగే వివరాలను పబ్లిక్ డాక్యుమెంట్లలో క్రమం తప్పకుండా వెల్లడిస్తారని పేర్కొన్నారు.

2007 నుంచి 2008 వరకు అదానీ పవర్‌లో 3i ఇన్వెస్ట్‌మెంట్ ఫండ్‌కు నామినీ డైరెక్టర్‌గా, ఆ తర్వాత 2017 వరకు అదానీ ఎంటర్‌ప్రైజెస్ డైరెక్టర్‌గా పనిచేసిన అనిల్ అహుజాకు హిండెన్‌బర్గ్‌ నివేదికలో పేర్కొన్న సమస్యలు లేదా వ్యక్తులతో ప్రస్తుత వాణిజ్య సంబంధాలు లేవని కంపెనీ ప్రతినిధి స్పష్టం చేశారు.

హిండెన్‌బర్గ్ తాజా ఆరోపణలు..
ఆగస్టు 10న విడుదల చేసిన హిండెన్‌బర్గ్ రీసెర్చ్‌లో అదానీ మనీ సిఫనింగ్ కుంభకోణంలో ప్రమేయం ఉన్న అస్పష్టమైన ఆఫ్‌షోర్ సంస్థల్లో సెబీ చైర్‌పర్సన్ మాదాబి పూరీ బుచ్, ఆమె భర్త వాటాలు కలిగి ఉన్నారని విజిల్‌బ్లోయర్ పత్రాలు వెల్లడించాయని ఆరోపించింది. వారు బెర్ముడా, మారిషస్‌లో ఉన్న ఈ నిధులను గౌతమ్ అదానీ అన్నయ్య వినోద్ అదానీ నియంత్రిస్తున్నారని, నిధులను తారుమారు చేయడానికి, అదానీ లిస్టెడ్ కంపెనీల్లో స్టాక్ ధరలను పెంచడానికి ఉపయోగించారని నివేదించింది.

ఈ ఆరోపణలపై మార్కెట్ రెగ్యులేటర్ సెబీ ఛైర్‌పర్సన్ మాధబి పూరీ బుచ్, ఆమె భర్త హిండెన్‌బర్గ్ నివేదికలో పేర్కొన్న నిధుల్లో తమకు సీక్రెట్ వాటాలు ఏమీ లేవని తేల్చిచెప్పారు. అలాగే పూర్తి పారదర్శకతను నిర్ధారించడానికి తగిన సమయంలో వివరణాత్మక ప్రకటనను విడుదల చేస్తామని వారు పేర్కొన్నారు.