Vijay Devarakonda: వ్యాపారంలో దూసుకెళ్తున్న విజయ్ దేవరకొండ..

హీరో విజయ్ దేవరకొండ సినిమాలతో పాటు బిజినెస్ కూడా చేస్తున్నారు. తాజాగా ఆయన 'అన్‌హైప్' అనే కొత్త చర్మ సంరక్షణ బ్రాండ్‌ను సహ భాగస్వామిగా ప్రయాణం మొదలు పెట్టారు. దేశీయ యువత రోజువారీ వినియోగానికి అనుగుణంగా పలు ఉత్పత్తులను ఈ బ్రాండ్‌పై విడుదల చేస్తున్నట్లు విజయ్ ప్రకటించారు. ఉత్పత్తుల రూపకల్పన, వాటి అభివృద్ధి, నాణ్యతా పరీక్షలకు సంబంధించిన అన్ని ప్రక్రియల్లోనూ తాను పాల్గొన్నట్లు వివరించారు. ఆయా ఉత్పత్తులను స్వయంగా 9 నెలల పాటు ఉపయోగించి, పరీక్షించినట్లు విజయ్‌ పేర్కొన్నారు. 'అన్‌హైప్' యువ భారతీయుల కోసం ముఖ్యంగా 18-30 ఏళ్ల వయస్సు వారి కోసం, ఒక ఫంక్షనల్ స్కిన్‌కేర్ లైన్‌గా అభివృద్ధి చేశారు.

విజయ్ దేవరకొండకు, 'అన్‌హైప్' అనేది కేవలం ఒక చర్మ సంరక్షణ బ్రాండ్‌కు తన పేరును ఇవ్వడం మాత్రమే కాకుండా, ఉత్పత్తుల అభివృద్ధిలో చురుకుగా పాల్గొంటూ తొమ్మిది నెలల పాటు చేసిన ప్రయాణానికి ఫలితం. పదేళ్లుగా ప్రజలు నన్ను చర్మ సంరక్షణ సలహాలు, చిట్కాలు, సూచనల కోసం అడుగుతున్నారని విజయ్ గుర్తు చేశారు. చివరికి తన దగ్గర ఒక సమాధానం ఉందని... తాను ఒక బ్రాండ్‌కు ప్రచారకర్తగా ఉండాలనుకోలేదు. దానిని సహ-నిర్మించమని వారు నన్ను అడిగారని విజయ్ పేర్కొన్నారు. "ప్రతి ఒక్క రకాన్ని నేను నా ముఖంపైనే ప్రయత్నించాను. తొమ్మిది నెలల తర్వాత, ఇప్పుడు మనం ఇక్కడ ఉన్నాం. అనవసరపు విషయాలు లేవు. ఏది పని చేస్తుందో అది మాత్రమే. నేను వీటిని నెలల తరబడి వాడుతున్నాను. ఇప్పుడు మీరు నాతో చేరాల్సిన సమయం వచ్చింది" అని విజయ్ తెలిపారు.

అన్‌హైప్ బ్రాండ్లలో మూడు ఉత్పత్తులు ఉంటాయి. అన్‌హైప్ ఉత్పత్తులు మొదట ఆన్‌లైన్ లో విక్రయించనున్నారు. ఈ బ్రాండ్ తన సొంత వెబ్‌సైట్, unhype.in ద్వారా ఉత్పత్తులు విక్రయించనుంది. ఈ రొటీన్‌ల కోసం ప్రీ-బుకింగ్ సెప్టెంబర్ 11న ప్రారంభం కాగా, ఉత్పత్తుల రవాణా, విస్తృత ప్రారంభోత్సవం సెప్టెంబర్ 21న మొదలవుతాయి. విజయ్ దేవరకొండ ఈ వ్యాపారమే కాదు.. ఆయనకు మహాబూబ్‌నగర్‌లో ఇప్పటికే ఒక మల్టీప్లెక్స్‌ ఉంది. హైదరాబాద్‌లో మరో థియేటర్‌పై కన్నేసినట్లు సమాచారం. తాజా సమాచారం ప్రకారం ఉత్తర హైదరాబాద్‌లోని వేగంగా అభివృద్ధి చెందుతున్న ప్రాంతాలను లక్ష్యంగా చేసుకుని మల్కాజ్‌గిరి లేదా మేడ్చల్‌లో కొత్త మల్టీప్లెక్స్‌ను ఏర్పాటు చేసే విషయాన్ని సదరు నటుడు పరిశీలిస్తున్నారని వార్తలు వస్తున్నాయి.

మహబూబ్‌నగర్‌లో ఇప్పటికే ఉన్న తన 'AVD సినిమాస్' (ఏషియన్ విజయ్ దేవరకొండ సినిమాస్) వ్యాపార నమూనాను అనుసరిస్తూ, ఈ కొత్త ప్రాజెక్ట్‌ను 'ఏషియన్ గ్రూప్'తో కలిసి చేపట్టే అవకాశం ఉంది. అయితే, ఈ ప్రాజెక్ట్ ఇంకా ప్రారంభ దశలోనే ఉందని, దీనికి సంబంధించిన స్థలం ఇంకా ఖరారు కాలేదని తెలుస్తోంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.