జీఎస్టీ 2.0..... ఈ పండుగ సీజన్ అమ్మకాలను బూమ్ చేస్తుందా లేదా స్లో చేస్తుందా?

పండుగల సీజన్‌ అంటే అమ్మకాల హంగామా. కానీ ఈసారి మాత్రం ఆ హంగామా గందరగోళంగా మారే సూచనలు కనబడుతున్నాయి. కారణం ఒక్కటే జీఎస్టీ రేట్లు తగ్గుతాయా? ఎప్పుడు తగ్గుతాయి? అనే సందేహం. వినియోగదారులు ఎదురు చూస్తున్నారు, తయారీదారులు కంగారు పడుతున్నారు, డిస్ట్రిబ్యూటర్లు స్టాక్‌ చేయడానికి వెనుకడుగు వేస్తున్నారు.

ప్రభుత్వం ఆగస్టు 15న జీఎస్టీ రేషనలైజేషన్‌ ప్రణాళికను ప్రకటించింది. అంటే, చాలా ఉత్పత్తులపై పన్ను రేట్లు తగ్గే అవకాశం ఉంది. ముఖ్యంగా 12% స్లాబ్‌లో ఉన్న 99% వస్తువులు 5%కి తగ్గబోతున్నాయి. ఇందులో ఎయిర్‌కండిషనర్లు, ఫ్రిజ్‌లు, ప్రీమియం డ్యూరబుల్స్‌పై పన్ను 28% నుంచి 18%కి తగ్గే అవకాశం ఉంది.

ఈ వార్త వినగానే చాలా మంది వినియోగదారులు "కొంచెం ఆగితే వస్తువులు చౌకగా దొరుకుతాయి" అనే ఆశతో కొనుగోళ్లు వాయిదా వేయడం మొదలుపెట్టారు. దీని వల్లే పండుగ సీజన్‌లోనే ఎక్కువ అమ్మకాలు జరుగుతాయి కాబట్టి, తయారీదారులకి పెద్ద సవాలు ఎదురవుతోంది.

ఏసీ కంపెనీల పరిస్థితి ఇప్పుడు కాస్త కష్టమైనది. వేసవిలో అమ్మకాలు ఎక్కువగా జరిగాయి కాబట్టి, కంపెనీలు పండుగ సీజన్‌ పై ఆధారపడతాయి. కానీ జీఎస్టీ రేట్లు తగ్గుతాయేమో అని స్పష్టత లేకపోవడం వల్ల, ప్రజలు "ఇంకా చౌకగా దొరుకుతుందేమో" అని ఆగిపోవచ్చు. దీని వల్ల కంపెనీల అమ్మకాలు తక్కువగా ఉండే అవకాశం ఉంది.

తయారీదారులే కాదు, డిస్ట్రిబ్యూటర్లూ ఇదే ఆలోచనలో ఉన్నారు. "కొత్త రేట్లు వచ్చే వరకు స్టాక్‌ ఎందుకు తీసుకుందాం? కొంత ఆగితే మరింత చౌక వస్తుంది" అని వారు కూడా వేచి చూస్తున్నారు. దీని వలన కంపెనీలు డిస్ట్రిబ్యూషన్‌ నెట్‌వర్క్‌లో కూడా స్లోడౌన్‌ను ఎదుర్కోవాల్సి వస్తోంది.

మన భారతీయ వినియోగదారులు "వాల్యూ-ఫర్-మనీ" అనే విషయంలో చాలా జాగ్రత్తగా ఉంటారు. 2-5% తగ్గింపు అవకాశమే ఉన్నా, కొంతమంది వెంటనే కొనకుండా ఆగిపోతారు. అవసరమైన వస్తువులు ఉదాహరణకు FMCG, రొటీన్‌ అవసరాలు వంటి ఉత్పత్తులు వాయిదా వేసే అవకాశం తక్కువగా ఉంటుంది. కానీ డ్యూరబుల్స్, అంటే ఏసీ, ఫ్రిజ్‌లు, టీవీలు, మొబైల్స్‌ వంటి పెద్ద వస్తువులను చాలా మంది వినియోగదారులు రేట్లు తగ్గుతాయేమో అని ఆగి చూస్తారు.

పండుగల సమయంలో అమ్మకాలకి ఒక ప్రధాన ప్రశ్న ఆధారపడి ఉంది. ప్రభుత్వం కొత్త జీఎస్టీ రేట్లను ఎప్పుడు అమలులోకి తెస్తుంది? దీపావళికి ముందే ఈ రేట్లు అమలు అయితే, పండుగ ఆఫర్లతో కలిపి వినియోగదారుల్లో భారీ డిమాండ్‌ రావచ్చని సూచనలు ఉన్నాయి. కానీ దీపావళి తర్వాత అమలు అయితే, కొనుగోళ్లు వాయిదా వేయబడే అవకాశం ఉండడంతో అమ్మకాలు బలహీనమయ్యే ప్రమాదం ఉంది. దీనికీ తోడు ఈ ఏడాది వాతావరణం కూడా ఏసీ కంపెనీలను పరీక్షించింది.

వేసవిలో తీవ్ర ఎండలు వస్తాయని అంచనా వేసి, కంపెనీలు స్టాక్‌ పెంచుకున్నాయి. కానీ అనూహ్య వర్షాలు, వాతావరణ మార్పుల వల్ల డిమాండ్‌ తక్కువైంది. గత సంవత్సరం మాత్రం ఎండలు ఎక్కువగా ఉండటంతో అమ్మకాలు రికార్డు స్థాయిలో జరిగాయి.

ఇప్పుడు పరిస్థితి పూర్తిగా పండుగ సీజన్‌పై ఆధారపడి ఉంది. కొత్త జీఎస్టీ రేట్లు పండుగకు ముందే అమలులోకి వస్తే, అమ్మకాలు బాగా పెరుగుతాయి. కానీ రేట్లపై స్పష్టత లేకపోతే, వినియోగదారులు కొంత ఆగిపోవడంతో అమ్మకాలు తగ్గే అవకాశం ఉంది.

జీఎస్టీ రేట్ల తగ్గింపు సమయమే ఈసారి పండుగ సీజన్‌ అమ్మకాల భవిష్యత్తు నిర్ణయించబోతుంది. వినియోగదారులు ఎదురు చూస్తున్నారు, కంపెనీలు ఆందోళనలో ఉన్నాయి, డిస్ట్రిబ్యూటర్లు కూడా సైలెంట్‌గా ఉన్నారు. ఈ పరిస్థితిలో ప్రభుత్వ నిర్ణయం ఎప్పుడు వస్తుందనేది మార్కెట్‌ గేమ్‌ చేంజర్‌ కానుంది.