ఆధార్ సెంటర్ల చుట్టూ తిరగక్కర్లేదు! ఇకపై మీ ఫోన్లోనే మొబైల్ నెంబర్ మార్చుకోవచ్చు! ప్రాసెస్ ఇదిగో..

ఆధార్ కార్డులో మొబైల్ నెంబర్ మార్చుకోవాలంటే ఇప్పటివరకు ఆధార్ సెంటర్ల చుట్టూ తిరగాల్సి వచ్చేది. బయోమెట్రిక్ వేయాలని, గంటల తరబడి క్యూలో నిలబడాలని ఇబ్బందులు పడేవాళ్లం. కానీ, భారత విశిష్ట గుర్తింపు ప్రాధికార సంస్థ (UIDAI) సామాన్యులకు ఒక అద్భుతమైన వార్త చెప్పింది. జనవరి 28, 2026 నుండి మీ స్మార్ట్‌ఫోన్ ద్వారానే "ఎక్కడైనా, ఎప్పుడైనా" ఆధార్ మొబైల్ నెంబర్‌ ను అప్‌డేట్ చేసుకునే సదుపాయాన్ని తీసుకువస్తోంది.

బయోమెట్రిక్ అవసరం లేదు.. ఫేస్ అథెంటికేషన్‌తో పని పూర్తి!

దశాబ్ద కాలంగా మొబైల్ నెంబర్ అప్‌డేట్ కోసం ఫిజికల్ సెంటర్లకు వెళ్లడం తప్పనిసరిగా ఉండేది. అయితే కొత్తగా రాబోతున్న ఫీచర్ ద్వారా, యూజర్లు తమ ఫోన్ కెమెరా సహాయంతో 'ఫేస్ అథెంటికేషన్' (ముఖ గుర్తింపు) ద్వారా తమ గుర్తింపును వెరిఫై చేసుకోవచ్చు. దీనివల్ల ఫింగర్ ప్రింట్ లేదా ఐరిస్ స్కాన్ కోసం ఆధార్ సేవా కేంద్రాలకు వెళ్లాల్సిన అవసరం ఉండదు.

యూజర్ల కోసం వచ్చే కీలక మార్పులివే..

జనవరి 28 నుండి అమల్లోకి రాబోతున్న కొత్త ఆధార్ యాప్ ద్వారా కలిగే ప్రయోజనాలు ఇవే:

1. డైరెక్ట్ అప్‌డేట్: బయోమెట్రిక్ స్కాన్ అవసరం లేకుండానే కొత్త మొబైల్ నంబర్‌ను యాప్ ద్వారానే లింక్ చేయవచ్చు.
2. డిజిటల్ ఆధార్: కొత్త "సెక్యూర్ క్యూఆర్ కోడ్" ఫీచర్‌ తో ఫిజికల్ ఆధార్ కార్డు జేబులో ఉంచుకోవాల్సిన అవసరం లేదు. హోటళ్లు, ఎయిర్‌పోర్ట్‌ లలో ఈ డిజిటల్ వెర్షన్ సరిపోతుంది.
3. వర్చువల్ ఐడి (VID): మీ 12 అంకెల ఆధార్ నంబర్‌ను ఎవరికీ చెప్పకుండానే, వర్చువల్ ఐడి ద్వారా ఐడెంటిటీ వెరిఫికేషన్ చేసుకోవచ్చు.
4. 24/7 సేవలు: ఆధార్ సెంటర్లు నిర్ణీత పని వేళల్లోనే ఉంటాయి, కానీ ఈ డిజిటల్ పోర్టల్ రోజులో ఎప్పుడైనా పనిచేస్తుంది.

జనవరి 28 తర్వాత అప్‌డేట్ చేయడం ఎలా? (స్టెప్-బై-స్టెప్)

• ప్లే స్టోర్ లేదా యాప్ స్టోర్ నుండి లేటెస్ట్ ఆధార్ యాప్ (Aadhaar App) డౌన్‌లోడ్ చేసుకోండి.
• హోమ్ స్క్రీన్‌పై ఉన్న 'Mobile Update' ఆప్షన్‌ను ఎంచుకోండి.
• యాప్ సూచించిన విధంగా ఫేస్ అథెంటికేషన్ పూర్తి చేయండి.
• మీరు మార్చుకోవాలనుకుంటున్న కొత్త నంబర్‌ను ఎంటర్ చేసి OTP ద్వారా వెరిఫై చేయండి.
• నిర్దేశించిన నామమాత్రపు రుసుము (రూ. 50 ఉండవచ్చు) ఆన్‌లైన్‌లో చెల్లించండి.

అయితే కేవలం మొబైల్ నంబర్ అప్‌డేట్ మాత్రమే ఆన్‌లైన్‌లో చేసుకోవచ్చు. ఒకవేళ 5 లేదా 15 ఏళ్ల పిల్లల ఫోటో లేదా బయోమెట్రిక్స్ అప్‌డేట్ చేయాల్సి వస్తే, ఖచ్చితంగా ఆధార్ సెంటర్‌కు వెళ్లాల్సి ఉంటుంది. అలాగే ఆధార్ అప్ డేట్ కోసం.. ఒరిజినల్ యాప్ మాత్రమే వాడాలి. నకిలీ యాప్‌ల పట్ల జాగ్రత్తగా ఉండాలని UIDAI హెచ్చరించింది.

ఏదేమైనా డిజిటల్ ఇండియా దిశగా అడుగులు వేస్తున్న తరుణంలో.. UIDAI తీసుకువచ్చిన ఈ 'ఎనీటైమ్, ఎనీవేర్' సదుపాయం సామాన్యులకు పెను ఊరటనిస్తుంది. అయితే, ఈ ప్రక్రియలో భద్రత కూడా అంతే ముఖ్యం. మీ ముఖ గుర్తింపు (Face Authentication) ద్వారా జరిగే ఈ వెరిఫికేషన్ ప్రక్రియను కేవలం అధికారిక 'ఆధార్ యాప్' ద్వారానే పూర్తి చేయండి. జనవరి 28 నుండి అందుబాటులోకి రాబోతున్న ఈ సరికొత్త ఫీచర్‌ను ఉపయోగించుకుని మీ ఆధార్ వివరాలను ఎప్పటికప్పుడు అప్‌డేట్ చేసుకోండి