Gold Loans: బంగారం రుణాల్లో దూసుకెళ్తున్న ఏపీ, తెలంగాణ.. దక్షిణాదిలోనే పసిడి రుణాలు ఎక్కువ..

బంగారం ధరలు పెరుగుతున్న కొద్దీ బంగారం తాకట్టు పెట్టి రుణాలు తీసుకోవడం కూడా పెరుగుతోంది. బంగారం ధరలు పెరగడం, రిజర్వ్ బ్యాంక్ ఆఫ్ ఇండియా (RBI) నిబంధనలలో సడలింపుల కారణంగా గత రెండేళ్లలో బంగారు రుణాలు నాలుగు రెట్లకు పైగా పెరిగింది. బంగారు ఆభరణాలపై తీసుకున్న రుణాలు జూలై 2024లో రూ. 1.24 లక్షల కోట్లుగా ఉండగా, జూలై 2026 నాటికి 4.4 రెట్లు పెరిగి రూ. 5.52 లక్షల కోట్లకు చేరాయి. జూలై 2025లో ఈ రుణాల మొత్తం రూ. 2.06 లక్షల కోట్లుగా ఉంది. ఈ భారీ పెరుగుదల వ్యక్తిగత రుణాల విభాగం స్వరూపాన్ని కూడా మార్చివేసింది. జూలై 2024లో మొత్తం వ్యక్తిగత రుణాలలో బంగారు రుణాల వాటా కేవలం 2.2 శాతంగా ఉండేది.

ఈ వాటా జూలై 2025 నాటికి రెట్టింపు కంటే ఎక్కువగా (4.8 శాతానికి) పెరిగింది. జూలై 2026 నాటికి 7.7 శాతానికి చేరింది. దీనికి భిన్నంగా విద్య, వినియోగ వస్తువులు, క్రెడిట్ కార్డ్ రుణాల ఉమ్మడి వాటా జూలై 2024లో 7.7 శాతం ఉండగా.. 2025లో 7.4 శాతానికి, జూలై 2026 నాటికి 6.7 శాతానికి తగ్గింది. బంగారు రుణాలు ఎక్కువగా దక్షిణ భారతదేశంలోనే తీసుకుంటున్నారట. హౌ ఇండియా లెండ్స్ (How India Lends) నివేదిక ప్రకారం, జూన్ 2026 నాటికి ఉన్న మొత్తం బంగారు రుణాలలో తమిళనాడు, ఆంధ్రప్రదేశ్, కర్ణాటక, తెలంగాణ, కేరళ అధిక భాగం ఉందట. ఐదు దక్షిణ రాష్ట్రాల వాటా 70 శాతానికి పైగా ఉంది. ఇందులో ఒక్క తమిళనాడు వాటానే 30 శాతం ఉండగా, తర్వాతి స్థానాల్లో ఆంధ్రప్రదేశ్ 15.9 శాతం, కర్ణాటక 10.2 శాతం ఉన్నాయి.

అయితే ఈ రుణాల వృద్ధి భౌగోళికంగా మరింత విస్తృత ప్రాంతాలకు వ్యాపిస్తోంది. 10 అతిపెద్ద రాష్ట్రాలలో ఉత్తరప్రదేశ్ బంగారు రుణాల విభాగం జూన్ నాటికి ఏడాది ప్రాతిపదికన 122.8 శాతం వృద్ధిని నమోదు చేసింది. పశ్చిమ బెంగాల్ 99.7 శాతం, రాజస్థాన్ 91.2 శాతం వృద్ధిని నమోదు చేయగా, గుజరాత్, తెలంగాణ రాష్ట్రాలు ఒక్కొక్కటి 80.5 శాతం వృద్ధిని సాధించాయి. బంగారం ధరల పెరుగుదలతో పాటు, నియంత్రణ పరమైన మార్పులు కూడా రుణగ్రహీతలకు చిన్న తరహా బంగారు రుణాలను మరింత ఆకర్షణీయంగా మార్చాయి. వినియోగ అవసరాల కోసం తీసుకునే రుణాల విషయంలో, తాకట్టు పెట్టిన బంగారం విలువకు రుణ పరిమాణానికి మధ్య ఉండే నిష్పత్తి (LTV)కి సంబంధించి RBI ఒక శ్రేణుల వారీ విధానాన్ని ప్రవేశపెట్టింది.

సవరించిన నిబంధనల ప్రకారం మొత్తం రూ. 2.5 లక్షల వరకు తీసుకునే రుణాలకు, తాకట్టు పెట్టిన బంగారం విలువలో 85 శాతం వరకు రుణాన్ని మంజూరు చేసే వెసులుబాటు రుణదాతలకు ఉంటుంది. రూ. 2.5 లక్షల కంటే ఎక్కువ, రూ. 5 లక్షల వరకు ఉండే రుణాలకు ఈ పరిమితి 80 శాతంగా ఉండగా, రూ. 5 లక్షల కంటే ఎక్కువ మొత్తానికి మాత్రం ఈ పరిమితి 75 శాతంగానే కొనసాగుతుంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.