8th Pay Commission: ఫిట్‌మెంట్ ఫ్యాక్టర్ లెక్కలు ఇవే..! మీ శాలరీ ఎంత పెరుగుతుందంటే..

కేంద్ర ప్రభుత్వ ఉద్యోగులు, పెన్షనర్లకు శుభవార్త! త్వరలో మీ జీతాలు పెరగనున్నాయి. అయితే ఎంతమేరకు పెరుగుతాయి అన్నదే ఇప్పుడు ప్రశ్న. 8వ పే కమిషన్ రాకతో తమ జీతాలు, పెన్షన్లు ఎంత పెరుగుతాయో అని ప్రతి ఒక్కరూ ఆసక్తిగా ఎదురుచూస్తున్నారు. ఇటీవల కేంద్ర ప్రభుత్వం 8వ పే కమిషన్ ఛైర్మన్, సభ్యులను నియమించి.. నిబంధనలను ప్రకటించినప్పటి నుంచి వీటిపై ఊహాగానాలు పెరిగాయి. ఇంతకీ శాలరీ ఎంత పెరుగుతుందంటే..

8వ పే కమిషన్ లో శాలరీ పెంపుని నిర్ణయించే ముఖ్యమైన అంశం - ఫిట్‌మెంట్ ఫ్యాక్టర్. ఇది ఒక మల్టిప్లయర్ నెంబర్.ఈ నెంబర్ ఆధారంగా మీ శాలరీ ఎంత పెరుగుతుందో తెలుసుకోవచ్చు. అయితే ఈ ఫిట్‌మెంట్ ఫ్యాక్టర్‌ను ఎలా నిర్ణయిస్తారు? 8వ పే కమిషన్ దీనిని ఎంతగా ప్రకటించే అవకాశం ఉంది? ఇప్పుడు తెలుసుకుందాం.

ఎలా నిర్ణయిస్తారు?

ఫిట్‌మెంట్ ఫ్యాక్టర్ అనేది పాత బేసిక్ పే (Basic Pay) ను కొత్త బేసిక్ పే లెవెల్‌కు మార్చడానికి ఉపయోగించే సంఖ్య. దీనిని ఏ కమిషన్ కూడా ఒక స్థిరమైన ఫార్ములా ప్రకారం లెక్కించదు. రకరకాల ఆర్థిక అంశాలను దృష్టిలో ఉంచుకుని ప్రభుత్వం, పే కమిషన్ దీనిని నిర్ణయిస్తాయి.

ప్రభావితం చేసే అంశాలు:

• ద్రవ్యోల్బణం (Inflation) & కాస్ట్ ఆఫ్ లివింగ్ : ద్రవ్యోల్బణం పెరిగితే ఫిట్‌మెంట్ ఫ్యాక్టర్ పెరుగుతుంది. దీనికోసం కమిటీలు సాధారణంగా వినియోగదారుల ధరల సూచిక (CPI-IW) ట్రెండ్‌లను పరిశీలిస్తాయి.
• ఆర్థిక సామర్థ్యం (Fiscal Capacity): ప్రభుత్వ ఖర్చుల పరిమితులు, బడ్జెట్ లభ్యతను కూడా పరిగణలోకి తీసుకుంటారు.
• ప్రైవేట్ రంగంలో జీతాలతో పోలిక: మార్కెట్‌లో ఇతర సంస్థలు ఇస్తున్న జీతాలను పరిశీలించి తగినట్టుగా ఫిట్‌మెంట్ ఫ్యాక్టర్ నిర్ణయిస్తారు.
• నిపుణుల అభిప్రాయం ప్రకారం.. ఫిట్‌మెంట్ ఫ్యాక్టర్ రూపకల్పనలో స్థిరమైన ఫార్ములా లేనప్పటికీ ద్రవ్యోల్బణం, మార్కెట్ సర్దుబాటు వంటి పలు అంశాలను పరిగణలోకి తీసుకుంటారు.

గత పే కమిషన్లలో ఫిట్‌మెంట్ ఫ్యాక్టర్ ఎంత?

గతంలో వచ్చిన పే కమిషన్లను ఒకసారి పరిశీలిస్తే.. 6వ CPCలో 1.86 ఫిట్‌మెంట్ ఫ్యాక్టర్ ను అమలు చేశారు. 24% డీఏ, 50% డీపీని విలీనం చేసి కొంత పెరుగుదలను అమలు చేశారు. 7వ CPC లో 2.57 ఫిట్‌మెంట్ ఫ్యాక్టర్ అమలు చేశారు. 125% డీఏను విలీనం చేసిన తర్వాత, ఉద్యోగులకు కనీసం 14% నిజమైన పెంపు (Real Hike) ఉండేలా చూశారు.

ఈసారి ఎంత ఉండవచ్చు?

ఫిట్‌మెంట్ ఫ్యాక్టర్‌పై కేంద్ర కేబినెట్ దే తుది నిర్ణయం అయినప్పటికీ.. వివిధ నివేదికలు, ఉద్యోగ సంఘాల అంచనాల ప్రకారం.. 8వ పే కమిషన్‌లో ఇది 2.0 నుంచి 2.57 మధ్య ఉండే అవకాశం ఉంది. ఆల్ ఇండియా ఎన్‌పీఎస్ ఎంప్లాయీస్ ఫెడరేషన్ జాతీయ అధ్యక్షుడు మంజీత్ సింగ్ పటేల్ గారి లెక్కల ప్రకారం, ఫిట్‌మెంట్ ఫ్యాక్టర్ కనీసం 2.13 ఉండవచ్చు. కమిషన్ నివేదిక సమర్పించే సమయానికి అంచనా వేసిన డీఏ (సుమారు 58% + అంచనా 7%) మరియు రెండు వార్షిక ఇంక్రిమెంట్లు (3.5% చొప్పున 7%) కలుపుకుంటే, ప్రస్తుత బేసిక్ పే దాదాపు 20% పెరిగే అవకాశం ఉంది. ఇది ఫిట్‌మెంట్ ఫ్యాక్టర్‌ను 1.58 నుంచి 1.78కి పెంచుతుంది.

జీతంపై ఫిట్‌మెంట్ ఫ్యాక్టర్ ప్రభావం ఎంత?

ఫిట్‌మెంట్ ఫ్యాక్టర్.. మీ పాత బేసిక్ శాలరీని కొత్త బేసిక్ శాలరీగా మారుస్తుంది. పాత బేసిక్ పేని ఫిట్‌మెంట్ ఫ్యాక్టర్ నెంబర్ తో గుణిస్తే కొత్త బేసిక్ శాలరీ వస్తుంది. ఉదాహరణకు పాత బేసిక్ పే రూ.18,000 ఉంటే.. దాన్ని 1.8 ఫిట్‌మెంట్ ఫ్యాక్టర్ తో గుణిస్తే.. రూ. 32,940 కొత్త బేసిక్ పే అవుతుంది. ఏదైమైనా ఈసారి 7వ పే కమిషన్ (2.57) కన్నా మెరుగైన ఫిట్‌మెంట్ ఫ్యాక్టర్‌ను ప్రభుత్వం ప్రకటించే అవకాశం ఉంది. ఉద్యోగులు, పెన్షనర్లు కూడా అదే ఆశతో ఉన్నారు.