ఒకప్పటి 50 లక్షలు ఇప్పుడు 10 లక్షలతో సమానం: బెంగళూరు ఐటీ జీతాలపై హాట్ డిబేట్!

బెంగళూరు ఐటీ రంగంలో సంవత్సరానికి 50 లక్షల (LPA) జీతం అనేది కొత్తగా 25 లక్షలతో సమానమా ? ఈ ప్రశ్న ప్రస్తుతం సోషల్ మీడియాలో ముఖ్యంగా X (గతంలో ట్విట్టర్)లో తీవ్ర చర్చకు దారితీసింది. సౌరవ్ దత్తా అనే ఒక యూజర్ ఈ ప్రశ్నను లేవనెత్తగా టెక్ నిపుణుల నుండి వందల కొద్దీ స్పందనలు వెల్లువెత్తాయి.

ఎందుకింత చర్చ: కొంతమంది నెటిజన్లు బెంగళూరులోని హై కాస్ట్ లివింగ్ కారణంగా 50 లక్షల జీతం కూడా పెద్దగా అనిపించడం లేదని వాదిస్తున్నారు. ఒకప్పటి 50 లక్షలు ఇప్పుడు కొత్త 10 లక్షలకి సమానం. చాలా మంది 1 కోటి కంటే ఎక్కువే సంపాదిస్తున్నారు" అని ఒకరు అంటుండగా, మరొకరు "మీరు బెంగళూరులో 1 కోటి కంటే ఎక్కువ సంపాదించకపోతే, అది సమయం వృథా. సర్దుకుని వెళ్లిపోవడం మంచిది" అని తీవ్రంగా స్పందించారు.

అయితే, అందరూ ఈ అభిప్రాయాన్ని అంగీకరించలేదు. జీతాల పెంపుదలపై స్పష్టత కోరుతూ, చాలా మంది ఈ సాధారణీకరణను ప్రశ్నించారు. మీరు దేనితో పోల్చుతున్నారు ? 2005, 2015 లేదా 2020 నాటి 10 లక్షలను ఇప్పుడు 50 లక్షలతో పోలుస్తున్నారా ?" అని ఒకరు అడిగారు.

టాప్ స్కిల్స్'కే అధిక జీతాలు: జీతాల స్థాయిలు పెరిగాయని చాలా మంది అంగీకరించినప్పటికీ, అలాంటి ప్యాకేజీలు సాధారణంగా అగ్రశ్రేణి ప్రతిభావంతులకే దక్కుతాయని ఎత్తి చూపారు. ఒక విధంగా అవును, కానీ అగ్రశ్రేణి నిపుణులకు మాత్రమే అని ఇంకొకరు అభిప్రాయపడ్డారు.

ప్రాంతీయ జీతాల తేడాలు: ఈ చర్చ భారతదేశంలోని ఇతర టెక్ హబ్‌లలో వేతన వ్యత్యాసాలను కూడా హైలైట్ చేసింది. ఇది బెంగళూరు వరకే, హైదరాబాద్‌లో 25 లక్షలు ఇప్పటికీ 25 లక్షలే. చాలా మంది దాని కంటే తక్కువ సంపాదిస్తారు అని ఒక సోషల్ మీడియా యూజర్ పేర్కొన్నారు. బెంగళూరులో జీతాలు పెరిగినట్లు కనిపించినా, కొన్ని షరతులకు లోబడి ఉంటాయని ఇది బట్టి చూస్తే సూచిస్తుంది.

జీతాల నిర్మాణంపై స్పష్టత: మైక్రోసాఫ్ట్ వంటి కంపెనీలు 50 లక్షల ప్యాకేజీని అందించినా, అందులో బేసిక్ సాలరీ కేవలం 16 లక్షలు మాత్రమే ఉంటుందని ఒక టెక్ ఉద్యోగి వివరించారు. మిగిలినది 3-4 సంవత్సరాలలో చెల్లించే రిస్ట్రిక్టెడ్ స్టాక్ యూనిట్లు (RSUలు) రూపంలో ఉంటుందని తెలిపారు. స్టాక్ పనితీరు, వెస్టింగ్ షెడ్యూల్‌లను బట్టి ప్రతినెలా చేతికి అందే జీతం 1.2 లక్షల వరకు తక్కువగా ఉండవచ్చని ఆయన పేర్కొన్నారు.

బెంగళూరు టెక్ వర్క్‌ఫోర్స్ 1 మిలియన్ దాటింది: ఈ చర్చల మధ్య, బెంగళూరు వరల్డ్ టెక్ సెంటరుగా తన స్థానాన్ని మరింత పదిలం చేసుకుంది. CBRE విడుదల చేసిన గ్లోబల్ టెక్ టాలెంట్ గైడ్‌బుక్ 2025 ప్రకారం, బెంగళూరు టెక్ వర్క్ ఫోర్స్ 1 మిలియన్ మార్కును దాటింది. ఆసియా-పసిఫిక్ ప్రాంతంలో ఇది అతిపెద్ద సాంకేతిక ప్రతిభ కేంద్రంగా నిలిచింది. PTI వార్తా సంస్థ ఉదహరించిన ఈ నివేదిక బెంగళూరును శాన్ ఫ్రాన్సిస్కో, న్యూయార్క్, లండన్ వంటి ప్రపంచ టెక్ దిగ్గజాలతో పాటు నిలుపుతుంది.