500 note: 500 నోటుపై శ్రీరాముడి ఫొటో.. మరోవైపు అయోధ్య రామమందిరం.. వివరాలు..

Ayodhya Rama Mandir: జాతిపితగా మహాత్మాగాంధీకి భారతదేశం ఎంతో ప్రాధాన్యత ఇస్తుంది. అందుకే మన కరెన్సీ నోట్లపై ఆయన చిత్రాన్ని ప్రచురించారు. అయితే కనీసం కొన్ని నోట్లపై అయినా ఇతర స్వాతంత్ర్య సమరయోధుల ఫొటోలు ప్రింట్ చేయాలని ఎప్పటినుంచో డిమాండ్ వినిపిస్తోంది. తాజాగా ఇందుకు సంబంధించిన ఓ న్యూస్ సోషల్ మీడియాలో వైరల్‌గా మారింది.

ఒక వైపు శ్రీరాముడి చిత్రం, మరోవైపు అయోధ్య రామ మందిరంతో అలంకరించబడిన 500 రూపాయల నోటు ప్రస్తుతం నెట్టింట ట్రైండ్ అవుతోంది. అయోధ్యలో రామమందిరాన్ని ప్రతిష్ఠించిన సందర్భంగా 22 జనవరి, 2024న విడుదల కానున్న కరెన్సీ నోట్లు అని ఈ ఫోటోలతో కూడిన పోస్ట్ సామాజిక మాధ్యమాల్లో హల్‌చల్ చేస్తోంది.

దీని ప్రామాణికతపై పలువురిలో అనుమానాలు వ్యక్తమవుతున్నాయి. అయితే ఈ విధంగా ఇష్టం వచ్చినట్లు కరెన్సీ నోట్లపై ఫొటోలను మార్చే అవకాశం లేదు. దేశంలో కరెన్సీ నోట్లను జారీ చేసేందుకు రిజర్వ్ బ్యాంక్ ప్రత్యేక అధికారాన్ని కలిగి ఉంది. RBI సెంట్రల్ బోర్డ్ చేసిన సిఫార్సులను పరిగణనలోకి తీసుకుని.. నోట్ల రూపకల్పన, రూపం మరియు మెటీరియల్‌ని కేంద్ర ప్రభుత్వంపై ఆమోదిస్తుంది.

అయితే రామమందిర ప్రతిష్ఠ సందర్భంగా కొత్త నోట్ల సిరీస్ విడుదల చేస్తున్నట్లు అటు రిజర్వ్ బ్యాంక్ కానీ, ఇటు కేంద్రం కానీ అధికారికంగా ప్రకటించలేదు. ఒకవేళ నిజంగా అటువంటిది జరిగి ఉంటే ఆ విషయాన్ని RBI ఖచ్చితంగా తన వెబ్‌సైట్‌లో తెలియజేస్తుంది మరియు పత్రికా ప్రకటనల ద్వారా ప్రజలకు నివేదిస్తుంది. ఈ తరహా వ్యవహారాలు ఏవీ జరగలేదు కాబట్టి ఇదంతా ఫేక్ న్యూస్ అని అర్థం చేసుకోవాలని విశ్లేషకులు చెబుతున్నారు.

వైరల్ ఇమేజ్ లో జాగ్రత్తగా పరిశీలిస్తే ఓ ట్విట్టర్ యూజర్ నేమ్‌ తో కూడిన వాటర్‌మార్క్‌ను గుర్తించవచ్చు. ఇందులో 'శ్రీరామ భక్తుడు గాంధీ కూడా ఇదే కోరుకున్నారు' అంటూ క్యాప్షన్ చూడవచ్చు. పోస్ట్ కింద ఉన్న వ్యాఖ్యలను చూస్తే, కేంద్ర ప్రభుత్వం నుంచి ఈ నోటు అధికారికంగా విడుదల చేయబడలేదని స్పష్టమవుతోంది.