Mudra loans: దేశ ఆర్థిక వృద్ధిలో గేమ్ ఛేంజర్స్ గా MSMEలు.. 8 ఏళ్లలో ఎంతమంది ముద్రా లోన్లు పొందారంటే..

Mudra loans: ప్రధాన్ మంత్రి ముద్రా యోజన (PMMY) కింద 40.82 కోట్ల మంది లబ్ధి పొందినట్లు కేంద్ర ఆర్థిక మంత్రి నిర్మలా సీతారామన్ తెలిపారు. ఈ ఏడాది మార్చి 24 నాటికి బ్యాంకులు మరియు ఆర్థిక సంస్థలు 23.2 లక్షల కోట్ల విలువైన రుణాలను మంజూరు చేసినట్లు చెప్పారు. ఏప్రిల్ 7 నాటికి ఈ పథకం ప్రారంభించి 8 ఏళ్లు అయిన సందర్భంగా ఓ ప్రకటన ద్వారా వివరాలు వెల్లడించారు.

వ్యవసాయ, కార్పొరేటేతర చిన్న, సూక్ష్మ పారిశ్రామికవేత్తల అభివృద్ధి కోసం ఏప్రిల్ 8, 2015న ప్రధానమంత్రి నరేంద్ర మోడీ ముద్రా రుణాలను ప్రవేశపెట్టారు. 10 లక్షల వరకు తనఖా అవసరం లేకుండా, సులువుగా రుణాలు అందించేందుకు ఈ పథకాన్ని కేంద్రం తీసుకొచ్చింది. PMMY కింద రుణాలను మెంబర్ లెండింగ్ ఇన్‌స్టిట్యూషన్స్ (MLI) అయిన బ్యాంకులు, నాన్-బ్యాంకింగ్ ఫైనాన్షియల్ కంపెనీలు (NBFCలు), మైక్రోఫైనాన్స్ సంస్థలు (MFIలు) నిర్వహిస్తున్నట్లు ఆర్థిక శాఖ తన ప్రకటనలో తెలిపింది.

PMMY లబ్ధిదారుల్లో 68 శాతం మంది మహిళా పారిశ్రామికవేత్తలే ఉన్నట్లు ఆర్థిక శాఖ వెల్లడించింది. 51 శాతం ఖాతాలు SC/ST, OBCలకు చెందినవేనన్నారు. దేశంలో ఔత్సాహిక వ్యాపారులకు క్రెడిట్ లభ్యతను సులభతరం చేయడం, కొత్త ఆవిష్కరణలు ప్రవేశపెట్టడం సహా తలసరి ఆదాయంలో స్థిరమైన పెరుగుదల సాధించడం కోసం ఈ రుణాలు తోడ్పాటు అందించాయంది.

MSMEల వృద్ధి మేక్ ఇన్ ఇండియా విజయవంతం కావడానికి భారీగా దోహదపడినట్లు నిర్మలా సీతారామన్ గుర్తుచేశారు. దేశీయంగా తయారైన వస్తువులను విదేశాలకు ఎగుమతి చేసే స్థాయిలో ఈ పరిశ్రమలు ఉత్పత్తిని పెంచాయన్నారు. అట్టడుగు స్థాయిలో పెద్ద ఎత్తున ఉపాధి అవకాశాలు పెంచడానికి మార్గం సుగమం చేశాయని తెలిపారు. భారత ఆర్థిక వ్యవస్థ వృద్ధిలో వీటిని గేమ్ ఛేంజర్స్ గా పేర్కొన్నారు.