రిజర్వ్ బ్యాంక్ ఆఫ్ ఇండియా ఈ నెల ప్రారంభంలో రెపో రేటును తగ్గించిన నేపథ్యంలో బ్యాంకులు వరుసగా రుణాలపై వడ్డీ రేటును సవరిస్తున్నాయి. ఇప్పటికే ఎస్బీఐ, హెచ్‌డీఎఫ్‌సీ సహా పలు బ్యాంకులు వడ్డీ రేట్లను తగ్గించాయి. ఆంధ్రా బ్యాంకు కూడా వడ్డీ రేట్లను 10 బేసిస్ పాయింట్ల మేర తగ్గించింది. అన్ని కాలపరిమితులకు వర్తించే విధంగా మార్జినల్ కాస్ట్ ఆఫ్ ఫండ్స్ బేస్డ్ లెండింగ్ రేట్ల (MCLR)ను 0.1 శాతం లేదా పది బేసిస్ పాయింట్లు తగ్గించింది. ఈ తగ్గింపు మంగళవారం నుంచి అమలులోకి వచ్చింది.

రెపో లింక్డ్ లెండింగ్ రేట్ (RLLR) తగ్గింపు నవంబర్ ఒకటో తేదీ నుంచి అమలు అవుతందని బ్యాంకు తెలిపింది. సాధారణంగా వినియోగ రుణాలపై వసూలు చేసే వడ్డీ రేటును నిర్ణయించే ఏడాది కాలపరిమితి MCLR రేటు 8.40 శాతం నుంచి 8.30 శాతానికి తగ్గుతుంది. RLLR 8.35 శాతం నుంచి 8.10 శాతానికి పరిమితం అవుతుంది. ఓవర్ నైట్ నుంచి ఆరు నెలల వరకు 7.80 శాతం నుంచి 8.20 శాతం వరకు ఉంటుంది.

కెనరా బ్యాంకు డిపాజిట్లపై వడ్డీ రేట్లను 0.25 శాతం మేర తగ్గించింది. తగ్గించిన రేట్లు ఈ నెల 15 నుంచి అమల్లోకి వస్తాయి. ప్రయివేటు బ్యాంకు దిగ్గజం హెచ్‌డీఎఫ్‌సీ కూడా రుణాలపై వడ్డీ రేటును 10 బేసిస్ పాయింట్లు తగ్గించింది. తగ్గిన వడ్డీ రేట్లు నేటి నుంచి (అక్టోబర్ 15వ తేదీ) నుంచి అమలులోకి తెస్తున్నట్లు ప్రకటించింది. దీంతో హోమ్ లోన్స్ మరింత చౌక కానున్నాయి. హోమ్ లోన్స్ పైన రిటైల్ ప్రైమ్ లెండింగ్ రేటు (RPLR) 0.1 శాతం తగ్గించింది. దీంతో రుణ రేట్లు 8.25 శాతం నుంచి 8.65 శాతం మధ్యకు చేరుకున్నాయి.