న్యూఢిల్లీ: హోండా మోటార్ సైకిల్ అండ్ స్కూటర్ ఇండియా (HMSI) భారత్ స్టేజ్ VI (బీఎస్6) ప్రమాణాలతో కూడిన యాక్టివా 125సీసీని విడుదల చేసింది. ఈ స్కూటర్ ప్రారంభ ధర రూ.67,490గా ఉంది. ఈ కంపెనీ తీసుకు వచ్చిన మొదటి బీఎస్6 వాహనం ఇది. సోమవారం 'ఏ క్వైట్ రివల్యూషన్' పేరుతో దీనిని తీసుకు వచ్చింది. కేంద్రమంత్రి నితిన్ గడ్కరీ, కంపెనీ ప్రతినిధులు దీనిని విడుదల చేశారు.

125సీసీ హెచ్ఈటీ బీఎస్6 పీజీఎం-ఎఫ్ఐ ఇంజిన్ పేటెంటెడ్ ఏసీజీ స్టార్టర్ మోటార్, డిజిటల్ అనలాగ్ మీటర్ ఈ స్కూటర్ ప్రత్యేకతలు. స్టాండర్డ్, అల్లాయ్, డీలక్స్ వేరియంట్లలో ఇది అందుబాటులో ఉంటుంది. ఈ నెల చివరి నాటికి ఇది రోడ్ల పైకి వస్తుంది. దశలవారీగా దేశవ్యాప్తంగా అంతటా ప్రారంభిస్తారు.

యాక్టివా 125సీసీ బీఎస్6 ద్వారా పరిశ్రమలో అత్యుత్తమ సాంకేతిక పరిజ్ఞానంతో, తదుపరి విప్లవానికి లీడర్‌గా నిలుస్తుందని హోండా సీఎండీ చెప్పారు. కొత్త కాలుష్యా మార్గదర్శకాలకు లోబడి తయారు చేశారు. ఇందుకు అనుగుణంగా ఈ స్కూటర్‌లో పలు మార్పులు చేసినట్లు, ముఖ్యంగా ఎల్‌ఈడీ లైటింగ్ వంటివి ఏర్పాటు చేసినట్లు కంపెనీ తెలిపింది. వచ్చే ఏడాది ఏప్రిల్ 1 నుంచి అన్ని రకాల వాహనాలు బీఎస్6 ప్రమాణాలకు తగ్గట్టుగా ఉండాలని సుప్రీంకోర్టు ఇప్పటికే ఆదేశాలు జారీ చేసింది.