హైదరాబాద్/అమరావతి: కేంద్ర ప్రభుత్వం సెప్టెంబర్ 1వ తేదీ నుంచి కొత్త మోటార్ వాహన సవరణ చట్టాన్ని అమలులోకి తీసుకు వచ్చిన విషయం తెలిసిందే. అయితే దీనిని పశ్చిమ బెంగాల్ సహా పలు రాష్ట్రాలు అమలు చేయడం లేదు. తెలుగు రాష్ట్రాలైన ఆంధ్రప్రదేశ్, తెలంగాణలు కూడా ప్రస్తుతానికి దీనికి దూరంగా ఉంటున్నాయి.

ట్రాఫిక్ నిబంధనలు పాటించని వాహనదారులకు కేంద్ర ప్రభుత్వం ప్రకటించిన భారీ జరిమానాల్ని సెప్టెంబర్ 1వ తేదీ నుంచి నుంచి అమలు చేయడం లేదని రవాణా శాఖ ముఖ్య కార్యదర్శి సునీల్ శర్మ తెలిపారు. మోటార్ వెహికల్ చట్టం 2019 (సవరణ) ప్రకారం విధించిన భారీ జరిమానాలపై అధ్యయనం చేస్తున్నామన్నారు.

తొలుత వాహనదారులకు అవగాహన కల్పించాల్సి ఉందని, ఆ తర్వాతే పెరిగిన జరిమానాలు విధించాలని రవాణా అధికారుల్ని ఆదివారం ఆదేశించారు. ఏపీ, కర్ణాటకతోపాటు ఇతర రాష్ట్రాల్లోనూ ఈ చట్టాన్ని అమలు చేయడం లేదన్నారు.