పెరిగిన నోట్ల సర్క్యులేషన్

ఇప్పుడు చలామణిలో ఉన్న కరెన్సీల్లో అధిక విలువైన రూ.2000, రెండో అధిక విలువ కలిగిన రూ.500 నోట్లకు ఎక్కువ డిమాండ్ ఉందని ఆర్బీఐ తెలిపింది. 2018 మార్చి నాటికి రూ.500, రూ.2,000 నోట్ల కరెన్సీ సర్క్యులేషన్ 80.2 శాతంగా ఉందని తెలిపింది. 2019 మార్చి నాటికి ఇది 82.2 శాతంగా ఉంది. అంటే ఈ నోట్ల సర్క్యులేషన్ గతంలో కంటే పెరిగింది.

పెద్ద నోట్లకు డిమాండ్

రూ.500, రూ.2,000 నోట్లలో ఎక్కువగా వాడకంలో ఉన్న నోట్లలో రూ.500 ఉండటం గమనార్హం. గత ఏడాది సర్క్యులేషన్‌లో రూ.500 నోట్లు 42.9 శాతంగా ఉంటే, ఈ ఏడాది 51 శాతంగా ఉంది.

పెరిగిన నకిలీ నోట్లు..

నోట్ల రద్దు తర్వాత నకిలీ రూ.500 నోట్ల (నోట్ల రద్దు తర్వాత కొత్త డిజైన్ కలిగిన నోట్లు) పెరుగుదల 121 శాతం ఉందని ఆర్బీఐ నివేదిక తెలిపింది. 2018-19లో నకిలీ రూ.2,000 నోట్లు 21.9 శాతంగా ఉన్నాయి. గత ఏడాదితో పోలిస్తే రూ.10, రూ.20, రూ.50 విలువ కలిగిన నకిలీ నోట్లు వరుసగా 20.2%, 87.2%, 57.3% గా ఉన్నాయి. రూ.100 నకిలీ నోట్లు మాత్రం 7.5 శాతం తగ్గాయి. రూ.200 నకిలీ నోట్లను కూడా గుర్తించినట్లు తెలిపింది. 2017 ఆగస్ట్‌లో ఈ నోట్లు ప్రవేశపెట్టారు. 2018-19 ఆర్థిక సంవత్సరంలో 12728 నకిలీ నోట్లు గుర్తించినట్లు తెలిపింది. అంతకుముందు ఏడాది 79 నోట్లు గుర్తించింది.

డిజిటల్ పరిస్థితేమిటి?

నోట్ల రద్దు తర్వాత ఓ వైపు డిజిటల్ ట్రాన్సాక్షన్స్ పెరుగుతున్నాయి. అదే సమయంలో కరెన్సీ సర్క్యులేషన్ కూడా పెరుగుతుండటం గమనార్హం.

కరెన్సీ వ్యాల్యూ 17 శాతం, కరెన్సీ నోట్ల సంఖ్య 6.2 శాతం (1,08,759) పెరిగిందని ఆర్బీఐ వార్షిక నివేదికలో పేర్కొంది. ప్రస్తుతం అందుబాటులో ఉన్న కరెన్సీలో రూ.500 నోట్ల విలువ 51 శాతమని పేర్కొంది. అంతేగాక రూ.500, 2,000 నోట్లు కలిసి మొత్తం కరెన్సీ విలువలో 82 శాతానికి సమానమని చెప్పింది. త్వరలోనే వార్నిష్ కోటింగ్‌తో కొత్త రకం రూ.100 నోట్లను ప్రవేశపెట్టనుంది. దివ్యాంగులు సులభంగా గుర్తించేలా ఉంటుంది. ఇక రిటైల్‌ ఎలక్ట్రానిక్ పేమెంట్ ట్రాన్సాక్షన్స్ 59% పెరిగి 23.3 బిలియన్లకు చేరాయని ఆర్బీఐ తాజా నివేదిక తెలిపింది.