దిగజారుతున్న ఆర్థిక వ్యవస్థ

గత కొన్ని నెలలుగా పాకిస్తాన్ ఆర్థిక పరిస్థితులు దిగజారుతున్నాయి. గత ఏడాదికి ద్రవ్యలోటు 8.9 శాతం నమోదు కాగా, దీని విలువ రూ.3.4 లక్షల కోట్లు. ప్రభుత్వ ఆదాయ, వ్యయాల మధ్య వ్యత్యాసాన్ని ద్రవ్యలోటు అంటాం.

పాకిస్తాన్‌కు చైనా, ఖతార్ వంటి దేశాలు బెయిలవుట్ ప్యాకేజీలు అందిస్తున్నాయి. ఇంటర్నేషనల్ మానటరీ ఫండ్ (IMF) పాకిస్తాన్‌కు 6 బిలియన్ డాలర్ల బెయిలవుట్ ప్యాకేజీకి ఆమోదం తెలిపింది.

IMF బెయిలవుట్ నిబంధన

IMF బెయిలవుట్ నిబంధన ప్రకారం ఆర్థిక సంవత్సరం ప్రారంభమయ్యే జూలై నాటికి ప్రభుత్వం రెవెన్యూ 40 శాతం పెరగాలి. 6 బిలియన్ డాలర్ల లోన్‌కు షరతులు విధించింది. IMF విధించిన ఆదాయ లక్ష్యానికి పాకిస్తాన్ చేరుకోకుంటే రుణ ప్రమాదంలో పడే అవకాశముంది.

నిర్దేశించిన లక్ష్యం కష్టమే

IMP నిర్దేశించిన లక్ష్యం కష్టంగా ఉందని కరాచీలోని అరీఫ్ హబీబ్ లిమిటెడ్ రీసెర్చ్ డైరెక్టర్ సమీయుల్లా తారిఖ్ అన్నారు. తాజా క్వార్టర్‌లో రెవెన్యూ క్షీణత 20 శాతంగా ఉందని, నాన్-ట్యాక్స్ రెవెన్యూలో 98 శాతం క్షీణత కారణంగా ఇరవై శాతం తగ్గింది.

ఈ క్వార్టర్‌లో కనుక లక్ష్యాన్ని చేరుకోని పక్షంలో ట్యాక్సెస్ పెంపుకు మినీ బడ్జెట్ ఉండవచ్చునని చెబుతున్నారు. నా జీవితంలో ఇలాంటి గణాంకాలు చూడలేదని మాజీ ఆర్థిక సలహాదారు అష్ఫాక్ హసన్ అన్నారు.

పాక్‌లో దారుణ పరిస్థితి...

తాజా ద్ర్యలోటు గమణిస్తే పాకిస్తాన్‌లో ఎలాంటి భయంకర పరిస్థితులు ఉన్నాయో అర్థం చేసుకోవచ్చు. పాక్ ఆర్థిక పరిస్థితులను చక్కదిద్దుతానని హామీ ఇచ్చి ఇమ్రాన్ ఖాన్ అధికారంలోకి వచ్చాడు. కానీ పరిస్థితులు మరింతగా దిగజారాయి. గత నెలలో పెట్రోల్, డీజిల్ ధరలను రూ.5 నుంచి రూ.6 మధ్య పెంచారు. పెట్రోల్ రూ.117, డీజీల్ రూ.132 వరకు ఉంది. కిరోసిన్ ధర కూడా పెరిగింది. కొత్త ఉద్యోగ నియామకాలు కూడా నిలిపేశారు. కార్ల కొనుగోలుపై నియంత్రణలు విధించారు.