న్యూఢిల్లీ: పెన్షనర్లకు గుడ్ న్యూస్! ఈపీఎఫ్ ఖాతాదారులకు కేంద్రం సంతోషకరమైన వార్తను చెప్పనుంది. ఈపీఎఫ్ కనీస పింఛన్‌ను పెంచే ఆలోచనలో ఉన్నట్లు కేంద్ర కార్మిక శాఖమంత్రి సంతోష్ గాంగ్వార్ తెలిపారు. ప్రస్తుతం కనీస పింఛన్ రూ.1,000 ఉంది. దీనిని రూ.5వేల వరకు పెంచాలనే డిమాండ్స్ ఉన్నాయి. ఆర్థికమంత్రిత్వ శాఖతో చర్చించి పదిహేను రోజుల్లో ఓ నిర్ణయానికి వస్తామన్నారు. పీఎఫ్ఓ ఖాతాదారులు 8 కోట్లకు పైగా పెరిగినట్లు తెలిపారు.

ఈపీఎఫ్ పైన ఉద్యోగులకు 5.65 శాతం వడ్డీ చెల్లించేందుకు త్వరలో ఆర్థిక శాఖ అనుమతి రానుందట. దేశంలో ఉద్యోగిత రేటు పెరుగుతుందని, ఈపీఎఫ్ఓ సబ్‌స్క్రైబర్ల సంఖ్య ఆరు కోట్ల నుంచి 8 కోట్లకు చేరడమే ఇందుకు నిదర్శనమన్నారు. కనీస పింఛన్ ధర రూ.వెయ్యిగా ఉండగా, రూ.2 వేలు, రూ.3వేలు, రూ.5వేలు పెంచాలని డిమాండ్స్ ఉన్నాయి. 15 రోజుల్లో నిర్ణయం తీసుకుంటామన్నారు.

కాగా, పెన్షన్ రిస్టోరేషన్ కమ్యూటెడ్ వ్యాల్యూ రికమండేషన్‌కు ప్రభుత్వం గురువారం ఆమోదం తెలిపింది. పెన్షన్ మార్పిడి విలువను పునరిద్ధరించాలనే సిఫార్సు ప్రతిపాదనకు పదిహేనేళ్ల తర్వాత ఆమోదం లభించింది. ఇది ఎంప్లాయీస్ పెన్షన్ స్కీం 1995 సవరణకు సంబంధించినది. ఇది పెన్షనర్ల దీర్ఘకాలిక డిమాండ్. హైదరాబాదులో జరిగిన సెంట్రల్ బోర్డ్ ఆఫ్ ట్రస్టీస్ ఈపీఎప్ సమావేశంలో ఈ నిర్ణయం తీసుకున్నారు.