న్యూఢిల్లీ : ఎంపిక చేసిన చానెళ్లే కాకుండా సెలక్ట్ చేయని చానళ్లను కూడా అంటగడుతున్నారనే విషయం నిర్ధారణ అయ్యింది. బ్రాడ్ కాస్టర్లు, డిస్ట్రిబ్యూటర్లు అవసరం లేని చానెళ్లను అంటగడుతున్నారని టెలికాం నియంత్రణ సంస్థ (ట్రాయ్) గుర్తించింది. వినియోగదారులు ఎంపిక చేసుకునే చానళ్లక సంబంధించి ధరల్లో సమస్యలు ఉన్నట్టు గుర్తించింది. ఈ మేరకు సదరు సంస్థలపై చర్యలు తప్పవనే సంకేతాలను ఇచ్చింది.

చానెళ్లకు సంబంధించిన అంశంలో వాటాదారులు తమ అభిప్రాయాలను వెల్లడించాలని ట్రాయ్ కోరింది. బ్రాడ్ కాస్టింగ్, కేబుల్ సర్వీసులకు సంబంధించి 2017 మార్చిలో న్యూ రెగ్యులేటరీ ఫ్రేమ్ వర్క్‌ను ట్రాయ్ నోటిఫై చేసింది. ఈ ముసాయిదా మార్గదర్శకాలు 2018 డిసెంబర్ 29 నుంచి అమల్లోకి వచ్చాయి. ట్రాయ్ కొత్త మార్గదర్శకాల ప్రకారం వినియోగదారులు తమకిష్టమైన చానెళ్లను ఎంపిక చేసుకునే అధికారాన్ని కల్పించింది.

బ్రాడ్ కాస్టింగ్ రంగంలో పారదర్శకతకు ఇది మార్గం వేసిందని టీవీ రంగ నిపుణులు పేర్కొన్నారు. వాస్తవానికి బ్రాడ్ కాస్టర్లు వినియోగదారులకు చానళ్లను ఎంపిక చేసుకునే అవకాశం కల్పించటం లేదని వెల్లడైంది. బొకేల పేరుతో అనవసరమైన చానెళ్లను చేర్చి వినియోగదారుల నుంచి డబ్బులు వసూల్ చేస్తున్నట్టు ట్రాయ్ గుర్తించింది. దీనిపై వారి అభిప్రాయాలను వెల్లడించాలని కోరింది.