జపాన్ ఇన్వెస్ట్‌మెంట్ బ్యాంకింగ్ దిగ్గజం సాఫ్ట్‌బ్యాంక్ టెలికం దిగ్గజం భారతీ ఎయిర్‌టెల్‌లో వాటాలు కొనుగోలు చేసేందుకు ప్రయత్నాలు చేస్తోంది. ఈ వాటాలను ప్రత్యక్షంగా లేదా పరోక్షంగా కొనుగోలు చేయనుంది. ఈ అంశానికి సంబంధించి చర్చలు జరుగుతున్నాయి. తన హోల్డింగ్స్ కంపెనీ ద్వారా వాటా కొనుగోలు చేయవచ్చు.

సాఫ్ట్‌బ్యాంకు వాటాలు కొనుగోలు చేయడం ద్వారా వచ్చిన నిధులతో భారతీ ఎయిర్‌టెల్ వ్యాపారంలో పెట్టుబడి పెట్టనుంది. ఈ ప్రతిపాదనలు ప్రస్తుతం చర్చల దశలో ఉన్నాయని, ఏం జరుగుతుందనేది అప్పుడే చెప్పలేమని అంటున్నారు. సాఫ్ట్‌బ్యాంక్ స్టార్టప్‌లలో, ప్రీ-ఇనిషియల్ పబ్లిక్ ఆఫర్లలో పెట్టుబడులు పెట్టేందుకు ఆసక్తి కనబరుస్తోంది.

ఎయిర్ టెల్ లో ఎంత మేర వాటా కొనుగోలుకు సాఫ్ట్‌బ్యాంక్ ప్రతిపాదిస్తుందో కూడా తెలియరాలేదు. ప్రాథమిక దశలో ఉన్న విక్రయ ప్రక్రియను ముందుకు తీసుకెళ్లడంపై ఎయిర్ టెల్ ప్రతినిధులతో సాఫ్ట్‌బ్యాంక్ విస్తృత సంప్రదింపులు కొనసాగుతున్నాయట. దీనిపై ఈ రెండు కంపెనీలు స్పందించాల్సి ఉంది.