ఇళ్లు కొనుగోలు చేసేవారికి హెచ్‌డీఎఫ్‌సీ శుభార్త చెప్పింది. ఆగస్ట్ 1వ తేదీ నుంచి గృహ రుణాలపై రిటైల్ ప్రైమ్ లెండింగ్ రేటును తగ్గిస్తున్నట్లు తెలిపింది. ఈ మేరకు హెచ్‌డీఎఫ్‌సీ బుధవారం ప్రకటించింది. ఇది ఆగస్ట్ 1వ తేదీ నుంచి అమలులోకి వస్తుంది.

అడ్జస్టబుల్ రేట్ హోమ్ లోన్స్‌ను ఆగస్ట్ 1వ తేదీ నుంచి పది బేసిస్ పాయింట్లు తగ్గిస్తున్నట్లు తెలిపింది. దీంతో రూ.30 లక్షల వరకు హోమ్ లోన్ తీసుకునే మహిళలకు వడ్డీ రేటు 8.55 శాతం, ఇతరులకు రూ.8.60 శాతం ఉంటుంది.

అలాగే, రూ.30 లక్షల నుంచి రూ.75 లక్షల మధ్య హోమ్ లోన్ తీసుకునే వారికి 8.85 శాతం, రూ.75 లక్షల కంటే ఎక్కువ లోన్ తీసుకునే వారికి 8.9 శాతం వడ్డీ రేటు ఉంటుంది. ఏ హోమ్ లోన్ పైన అయినా మహిళా కొనుగోలుదారులకు 5 బేసిస్ పాయింట్స్ తక్కువ వడ్డీ రేటు ఉంటుంది.

ఇదివరకే యూనియన్ బ్యాంక్ ఎంసీఎల్ఆర్‌ను 20 బేసిస్ పాయింట్స్ తగ్గించింది. దీంతో వడ్డీ రేట్లు తగ్గాయి. కాగా, స్టేట్ బ్యాంక్ ఆప్ ఇండియా ఇదివరకే లెండింగ్ రేటును 5 బేసిస్ పాయింట్స్ తగ్గించింది. వన్ ఇయర్ వడ్డీ రేటును 8.45 శాతం నుంచి 8.40 శాతానికి తగ్గించింది.