ప్రముఖ ఈ-కామర్స్ సంస్థ షాప్ క్లూస్ నష్టాల బాట పట్టింది. ఎంతో ప్రతిష్టాత్మకంగా ప్రారంభించిన ఈ సంస్థ అనతికాలంలోనే మంచి లాభాలు గడించింది. అయితే మార్కెట్లో మరిన్ని ఈ-కామర్స్ సైట్స్ రావడంతో షాప్ క్లూస్ ఈ పోటీలో నిలువలేకోపోయింది. ఫలితంగా నష్టాల దిశగా పయనించింది. తాజాగా షాప్‌క్లూస్ సంస్థలో పనిచేసే 50శాతం మంది ఉద్యోగులను తీసివేస్తున్నట్లు ప్రకటన చేసి ఉద్యోగస్తులకు షాక్‌కు గురిచేసింది. గురుగ్రామ్‌లోని కార్యాలయంలో ఉద్యోగస్తులందరు సమావేశం కావాల్సిందిగా చెబుతూ ఓ ఈమెయిల్‌ను వారికి పంపడం జరిగింది.

ఈమెయిల్ రావడంతో ఉద్యోగస్తులందరూ గురుగ్రామ్ కార్యాలయానికి చేరుకున్నాక షాకింగ్ ప్రకటన చేశారు. కొందరి పేర్లను ప్రకటిస్తూ వారందరినీ తొలగిస్తున్నట్లు సంస్థ తెలిపింది. జూలై 18 వరకు తమకు వేతనాలను చెల్లిస్తామని చెప్పిన షాప్‌క్లూస్ సంస్థ ఇంత హఠాత్తుగా ఉద్యోగుల తొలగింపుకు పరిహారం ఏమీ ఇవ్వలేమని ప్రకటించింది. ఇక తొలగించబడిన ఉద్యోగులు చాలామంది ఆపరేషన్స్ విభాగానికి చెందినవారు కావడం విశేషం

ఈ ఏడాది ఏప్రిల్ నాటికి కంపెనీలో దాదాపు 600 మంది ఉద్యోగస్తులు ఉండేవారు. ఇక నష్టాల బాటలో పయనిస్తున్న నేపథ్యంలో సంస్థ యాజమాన్యం 200 మందిని తొలగించింది. దీంతో ఉద్యోగస్తుల సంఖ్య 400కు చేరుకుంది. ఇక బుధవారం ప్రకటనతో దాదాపు 200 మందిని తొలగించింది. ప్రస్తుతం ఆ సంస్థలో పనిచేసే ఉద్యోగుల సంఖ్య 200 మాత్రమే ఉంది. అయితే ఇప్పటి వరకు అధికారికంగా ఇంకా వివరాలు సంస్థ తెలపలేదు. అయితే తమ కంపెనీలో పనిచేస్తున్న ఉద్యోగస్తులు మరో చోట ఉద్యోగం వెతుక్కోవాలంటూ ఈ ఏడాది ఏప్రిల్‌ నెలలోనే చిన్న హింట్ ఇచ్చింది. దీంతో షాప్‌క్లూస్ ఉద్యోగులు ఇతర కంపెనీల్లో ఉద్యోగం కోసం వెతికి కొందరు కొత్త ఉద్యోగంలో చేరారు.

గత రెండేళ్లలో ఉద్యోగస్తుల తొలగింపుపై కంపెనీ దృష్టిసారించిందని షాప్‌క్లూస్ ప్రతినిధి ఒకరు తెలిపారు. వారి స్థానంలో ఆటోమేటిక్ మెషీన్లను రీప్లేస్ చేస్తున్నట్లు తెలిపారు.ఇక 50శాతం ఉద్యోగస్తులను తొలగించడంతో ఇక లాభాలపై దృష్టిసారిస్తామని షాప్‌క్లూస్ యాజమాన్యం తెలిపింది. గత రెండేళ్లుగా వచ్చిన నష్టాలను పూడ్చి లాభాల దిశగా పయనించేందుకు ప్రయత్నిస్తామని చెప్పారు. ఇదిలా ఉంటే షాప్‌క్లూస్‌ను మరో ఈ-కామర్స్ సంస్థ స్నాప్ డీల్ కొనుగోలు చేయాలని భావించింది. అయితే అది కొన్ని కారణాలతో డీల్ నిలిచిపోయింది. 300 నుంచి 350 మిలియన్ డాలర్లకు కంపెనీని అమ్మకానికి పెడుతున్నట్లు చెప్పడంతో ఈ రేటుపై అభ్యంతరం తెలిపింది స్నాప్ డీల్.