స్థిరాస్తి కొనుగోలు రంగంలో చోటు చేసుకునే మోసాలకు చెక్ పెట్టేందుకే 'రెరా'

స్థిరాస్తి కొనుగోలు రంగంలో చోటు చేసుకునే మోసాలు, అవకతవకలకు చెక్‌ పెట్టేందుకు రెండేళ్ల క్రితం కేంద్ర ప్రభుత్వం రెరా చట్టం తీసుకొచ్చింది. ఆ తర్వాత ఏపీ, తెలంగాణతో పాటు దాదాపు అన్ని రాష్ట్రాలు ఆ చట్టం ప్రాతిపదికపై తమ సొంత రెరా చట్టాలు అమల్లోకి తెచ్చాయి. ఈ చట్టంతో బిల్డర్ల ఆగడాలకు చెక్‌ పెట్టే అవకాశం ఏర్పడింది.అలాగే కొనుగోలు దారులకు భద్రత కల్పించబడింది. 'రెరా'చట్టం వల్ల అందులో నమోదు చేసుకుంటే ప్రతి స్థిరాస్తి వ్యవహారం పూర్తి పారదర్శకంగా జరుగుతుంది . కొనుగోలుదారులు చెల్లించే నగదును, రియల్టర్లు తమకు నచ్చినట్టు వాడుకోవడం లేదా వేరే ప్రాజెక్టులకు మళ్లించేందుకు అవకాశం ఉండదు. ఆధిక పరమైన చేల్లిపులే కాదు స్థలాలకు సంబంధించిన, భవనాలకు సంబంధించిన సమగ్ర వివరాలు ఉంటాయి. కాబట్టి మోసం చేసే చాన్స్ ఉండదు.

కొనుగోలుదారులకు , రియల్టర్లకు ‘రెరా' చట్టం భద్రత

బిల్డర్లు ఆయా ప్రాజెక్టులను నిర్దిష్ట కాలవ్యవధి లోగా నిర్ణీత ప్రమాణాలతో పూర్తి చేయాల్సి ఉంటుంది. ఇక ప్లాట్లు లేదా ఫ్లాట్లు కొనుగోలుదారులకు జాప్యం లేకుండా సక్రమంగా అందుతాయి. ప్రతి రియల్టీ ప్రాజెక్టును ముందుగానే అన్ని వివరాలతో రిజిస్ట్రేషన్‌ చేయించుకోవాలి కాబట్టి అన్ని వివరాలు పూర్తిగా పరిశీలించాకే 'రెరా' అనుమతిని ఇస్తుంది.

రెరా రిజిస్ట్రేషన్‌ నెంబర్‌ లేకుండా ఇళ్ల స్థలాలు, ఫ్లాట్లు, భవనాలు ఇత్యాది ఎటువంటి స్థిరాస్తుల అమ్మకాలు చేయకూడదు. అంతే కాదు ప్రచారం సైతం చెయ్యరాదు . ఈ నిబంధనలు ఉల్లంఘించే స్థిరాస్తి సంస్థలు లేదా వ్యక్తులపై భారీ జరిమానా కూడా విధిస్తారు. నిబంధనలకు లోబడి, సజావుగా తమ కార్యకలాపాలను నిర్వర్తించే రియల్టర్లకు ‘రెరా' చట్టం రక్షణ కల్పిస్తుంది. రెరా వద్ద నమోదైన ప్రాజెక్టుల్లో ప్రమోటర్లు, బిల్డర్లు, కొనుగోలుదారుల మధ్య ఏమైనా అంశాల్లో విభేదాలు తలెత్తితే, వాటిని సామరస్యంగా పరిష్కరించేందుకూ రెరా కృషి చేస్తుంది. కనుక 'రెరా' రిజిస్ట్రేషన్ ఉన్న వాటినే కొనుగోలు చెయ్యటం ఎంతో శ్రేయస్కరం అని ప్రభుత్వాలు చెప్తున్నాయి.

ఏపీలో రెరా చట్టం అమలు నామమాత్రం .. రాజధాని ప్రాంతంలో కొనుగోలుదారులు జర భద్రం

రెరా చట్టం పకడ్బందీగానే ఉన్నా ఇప్పటికీ స్థిరాస్తుల కొనుగోలుదార్లలో చాలా మందికి ఈ చట్టంపై సరైన అవగాహన లేక ఏదో నామమాత్రంగానే 'రెరా' లో రిజిస్ట్రేషన్ చేయిస్తున్న పరిస్థితి. రాజధానిగా అమరావతిని ప్రకటించిన తర్వాత దాని చుట్టుపక్కల కృష్ణా, గుంటూరు జిల్లాల్లో లెక్కకు మిక్కిలిగా రియల్‌ ఎస్టేట్‌ వెంచర్లు వెలిశాయి. ‘క్యాపిటల్‌ క్రేజ్‌'ను సొమ్ము చేసుకునే తాపత్రయంలో పలువురు రియల్టర్లు ఇళ్ల స్థలాల వెంచర్లు, అపార్ట్‌మెంట్ల నిర్మాణాన్ని చేపట్టారు. గత రెండేళ్లలో ఇలాంటి వెంచర్ల సంఖ్య మరింత పెరిగింది. వీటిల్లో చాలావాటికి ఏపీసీఆర్డీయే అనుమతులున్నప్పటికీ, ‘రెరా' రిజిస్ట్రేషన్‌ నెంబర్లు లేవు. అయినప్పటికీ ఈ విషయం పెద్దగా పట్టించుకోకుండా, చాలామంది అలాంటి వెంచర్లలో కొనుగోళ్లు జరిపారు. ఇదే పరిస్థితి రాష్ట్రంలోని పలు నగరాలు, పట్టణాల్లోనూ, ఉంది .అంతా సజావుగా సాగితే ఫర్లేదు అనుకోని పరిణామాలు లేదా రియల్టర్ల లాభాపేక్ష, స్వార్ధంతో ఏమైనా ప్రాజెక్టులు అర్ధంతరంగా, అసంపూర్ణంగా ఆగిపోతే వాటిల్లో కొనుగోళ్లు జరిపిన వారు నష్టపోవడం తథ్యం.అలా నష్టపోకుండా ఉండాలంటే 'రెరా' లో నమోదై ఉంటేనే కొనుగోలు చెయ్యండి.