గ్రామీణ భారతం, వ్యవసాయానికి ఊతం

ఈ బడ్జెట్‌లో సంపన్నులపై కాస్త భారం పడుతుండగా, గ్రామీణ భారతం, వ్యవసాయ రంగానికి ఊతమిచ్చేలా నిర్ణయాలు తీసుకున్నారు. ఆదాయ పన్నుపై రూ.5 లక్షల వరకు మినహాయింపును గత మధ్యంతర బడ్జెట్‌లోనే ఇచ్చినందున ఈసారి కూడా యథాతథంగా ఉంచారు. అయితే ఇతర ప్రయోజనాలు కల్పించారు. ప్రభుత్వం రంగ బ్యాంకులకు రూ.70వేల కోట్లు మూలధన సహాయం కింద అందించనున్నారు.

ప్రతి రూపాయిలో ఇలా...

కాగా, ప్రభుత్వ ఖజానాకు చేరే ప్రతి రూపాయిలో 68 పైసలు ప్రత్యక్ష, పరోక్ష పన్నుల నుంచే వస్తున్నాయి. ప్రభుత్వ వ్యయంలో సింహభాగం అంటే 23 శాతం పన్నులు, సుంకాల్లో రాష్ట్రాల వాటా కింద ఆయా రాష్ట్రాలకు కేంద్రం చెల్లిస్తోంది. 18 పైసలు వడ్డీలకు చెల్లిస్తోంది. డిఫెన్స్‌కు 9 పైసలు ఖర్చు చేస్తోంది. కేంద్ర పథకాల కోసం 13 పైసలు ఖర్చు చేస్తోంది. బడ్జెట్ గణాంకాల ప్రకారం ప్రభుత్వానికి సమకూరే ప్రతి రూపాయి రాబడిలో జీఎస్టీ నుంచి వచ్చే ఆదాయం 19 పైసలుగా ఉంది. ప్రతి రూపాయిలో అత్యధికంగా కార్పొరేషన్ పన్ను వాటా 21 పైసలుగా ఉంది.

ఆదాయపన్ను వాటా 16 పైసలు

రుణాలు, ఇతర మార్గాల్లో సమీకరించే రాబడి ప్రతి రూపాయిలో 20 పైసలు కాగా, వసూలయ్యే ప్రతి రూపాయిలో ఆదాయ పన్ను వాటా 16 పైసలు. పెట్టుబడుల ఉపసంహరణ వంటి పన్నేతర రాబడుల నుంచి ప్రతి రూపాయిలో 9 పైసలు సమీకరించాలని కేంద్రం యోచిస్తోంది. ప్రభుత్వానికి సమకూరే ప్రతి రూపాయిలో 8 శాతం యూనియన్ ఎక్సైజ్ డ్యూటీ, 4 పైసలు కస్టమ్స్, 3 పైసలు రుణేతర పెట్టుబడి వసూళ్ల నుంచి వస్తోంది.