టాటా టిగోర్

రూ.9.99 లక్షల ప్రారంభ ధరతో టాటా టిగోర్ లాంఛ్ అయింది. 16.2 కిలో వాట్ల బ్యాటరీ సామర్థ్యం ఉంది. ఒక సారి ఛార్జ్ చేస్తే 142 కిలోమీటర్లు ప్రయాణించగలదు. ఒక బ్యాటరీప్యాక్‌ను 6 గంటల్లో 80 శాతం వరకూ ఛార్జ్ చేసుకోవచ్చు. అదే సాధారణ ఏసీ సాకెట్, 15 కివీ ఫాసౌట్ ఛార్జర్ ఉంటే 90 నిమిషాల్లోనే బ్యాటరీని ఛార్జ్ చేసుకోవచ్చని కంపెనీ చెబ్తోంది. టాటా మోటార్స్ ఈ వాహనానికి మూడేళ్లు లేదా 1.25 లక్షల కిమీ వరకూ వారెంటీని అందిస్తోంది. అయితే ప్రస్తుతానికి ఈ కార్ ఫ్లీట్ ఓనర్లకు మాత్రమే అమ్ముతున్నారు. రిటైలర్లు కొనే అవకాశం లేదు.

మహీంద్రా ఈ2ఓ ప్లస్

రూ.5.5 - 8.5 లక్షల ప్రైస్ రేంజ్‌లో కార్ లభ్యమవుతోంది. గతంలో రేవా పేరుతో ఉండే ఈ కారును కొద్దిగా మాడిఫై చేసి మహీంద్రా విక్రయిస్తోంది. నాలుగు డోర్లు ఉండే ఈ ఎలక్ట్రిక్ హ్యాచ్ బ్యాక్ కార్ 11 కిలోవాట్ల లిథియమ్ అయాన్ బ్యాటరీతో నడుస్తుంది. ఒక్కసారి ఛార్జ్ చేస్తే 110 కిమీలు ప్రయాణించగలదు. అయితే టాప్ ఎండ్ వేరియంట్ 140 కిమీ వరకూ వెళ్లే వీలుంటుంది. బేస్ వేరియంట్ 6 గంటల్లోపు ఛార్జింగ్ పూర్తి చేసుకుంటే, టాప్ ఎండ్ వేరియెంట్ మాత్రం పెద్ద బ్యాటరీ కారణంగా 7.2 గంటల ఛార్జింగ్ సమయం తీసుకుంటుంది. అయితే 32యాంప్స్ ఫాస్ట్ ఛార్జర్‌తో ఇది గంటన్నరలోనే ఛార్జింగ్ చేసుకునే సౌలభ్యమూ ఉంది.

మహీంద్రా ఈ వెరిటో

రూ.9.5-11 లక్షల మధ్య ఈ కార్ లభ్యమవుతోంది. ఇది ఫోర్ డోర్ సెడాన్ కార్. 13.91 కిలోవాట్ల లిథియం అయాన్ బ్యాటరీతో నడుస్తోంది. ఒకసారి ఛార్జ్ చేస్తే 110 కిమీ రేంజ్ వస్తుంది. అయితే టాప్ ఎండ్ వేరియెంట్ మాత్రం ఒకసారి ఛార్జ్ చేస్తే 140 కిమీ వరకూ ప్రయాణిస్తుంది.

13.91 కిలో వాట్ల బ్యాటరీని సాధారణంగా ఛార్జ్ చేసేందుకు 8.30 గంటల సమయం పడ్తుంది. అదే ఫాస్ట్ ఛార్జర్‌తో మాత్రం గంటన్నరలో చేసేయొచ్చు.

త్వరలో మరిన్ని ఎలక్ట్రిక్ కార్లు...

త్వరలో- హుందాయ్ కోనా, మహీంద్రా ఈకెయూవీ 100, మారుతి వ్యాగన్ ఆర్, నిస్సాన్ లీఫ్ కార్లు మార్కెట్లోకి రాబోతున్నాయి. మరో ఏడాది, ఏడాదిన్నరలో ఈ కార్లు రోడ్లపై పరుగులు తీయొచ్చు.

ప్రస్తుతానికి ఒక్క మహీంద్రా మాత్రమే ఈ ఎలక్ట్రిక్ వెహికల్ స్పేస్‌లో ఉండడం వల్ల జనాలు అంత ఆసక్తి చూపడం లేదు. పైపెచ్చు బ్యాటరీ మధ్యలో ఆగిపోతే ఎలాంటి ఛార్జింగ్ వ్యవస్థా లేకపోవడంతో జనాలు కూడా ధైర్యం చేయడం లేదు. అయితే రాబోయే నాలుగైదేళ్లలో మాత్రం ఈ వ్యవస్థ అనూహ్యంగా వృద్ధి చెందడం మాత్రం పక్కాగా కనిపిస్తోంది.