12వేల కోట్లు అడిగిన వైద్య ఆరోగ్య శాఖ

వచ్చే బడ్జెట్లో రూ.రూ.12,713.90 కోట్లు కేటాయించాలని ఆర్థిక శాఖను వైద్య ఆరోగ్య శాఖ కోరింది. గత ఏడాది కంటే రూ.50.22 శాతం అదనంగా నిధులు కోరింది. ఉద్యోగులు, వైద్యుల వేతనాల చెల్లింపుల కోసం రూ.11,539.70 కోట్లు, ఆసుపత్రుల భవన నిర్మాణాలు, ఆరోగ్యశ్రీ, ఇతర అవసరాల కోసం రూ.1,174.20 కోట్లు అవసరమని తెలిపింది. జలవనరుల శాఖ రూ.30వేల కోట్లకు ప్రతిపాదనలు పంపించింది. జలయజ్ఞం ప్రాజెక్టులకు రూ.8వేల కోట్లు అవసరమని ప్రతిపాదించారు. పోలవరం ప్రాజెక్టు కోసం రూ.9వేల కోట్లు అడిగారు. పునరావాసం కోసం రూ.8వేల కోట్లు అడిగారని తెలుస్తోంది. బ్రాహ్మణ కార్పోరేషన్ రూ.150 కోట్లకు ప్రతిపాదనలు పంపించింది.

5వేల కోట్లు అడిగిన ఆర్థిక శాఖ

బడ్జెట్లో రూ.5,116.40 కోట్లు కేటాయించాలని రెవెన్యూ శాఖ కోరింది. రూ.3,686 కోట్లు ఎన్నికల మేనిఫెస్టోలో పేర్కొన్న హామీల అమలుకు అవసరమని తెలిపింది. కొత్త జిల్లాల ఏర్పాటుకు రూ.25 కోట్లు, అర్హులైన పేదలకు ఉచిత ఇంటి స్థలాల కోసం పెద్ద ఎత్తున నిధులు అవసరమని పేర్కొంది. తొలి ఏడాది 3.50 లక్షల మందికి ఇళ్ల స్థలాలు కేటాయింపు లక్ష్యమని తెలిపింది. రూ.10,619 కోట్లు కేటాయించాలని పౌరసరఫరాల శాఖ కోరింది. ఇందులో రూ.5,600 కోట్లు బియ్యం, ఇతర సరుకుల పంపిణీపై రాయితీ కోసం, మిగతా రూ.5వేల కోట్లు గత ప్రభుత్వం హయాంలో చెల్లించాల్సిన బకాయిలు అని పేర్కొంది. సెప్టెంబర్ 1వ తేదీ నుంచి కార్డుదారులకు బియ్యాన్ని 5, 10 కేజీల సంచుల్లో ప్యాక్ చేసి ఇంటికి అందిస్తామని ప్రభుత్వం ప్రకటించిన నేపథ్యంలో ప్రత్యేకంగా 157 ప్యాకింగ్ యూనిట్లు, సంచుల తయారీ/సేకరణకు బడ్జెట్ అవసరమని తెలిపింది.

దాదాపు రూ.40వేల కోట్ల ప్రతిపాదనలు పంపిన విద్యాశాఖ

ఇంటర్ వరకు అమ్మఒడి, కేంద్రీయ వంటశాలలు, పాఠశాలల్లో మౌలిక సదుపాయాల కింద విద్యాశాఖ ఈ కొత్త పథకాల కోసం రూ.9,168 కోట్లకు ప్రతిపాదనలు పంపించింది. ఒకటి నుంచి పదో తరగతి వరకు అమ్మఒడి పథకానికి రూ.5,500 కోట్లు అవుతాయని అంచనా. మొత్తంగా అన్ని కలిపి రూ.39,897.42 కోట్లకు ప్రతిపాదనలు పంపించారు. టెక్ 19, ఐ-హబ్‌కు అదనంగా రూ.65 కోట్లు ప్రతిపాదించారు. టీచర్ల వేతనాలకు రూ.20,864 కోట్లు, ఉన్నత విద్యకు రూ.3,171 కోట్లు ప్రతిపాదించారు. కాలేజీ విద్యకు రూ.1,339 కోట్లు, విశ్వవిద్యాలయాలు, యూజీసీ - 2016 వేతన బకాయిలు, కడప సీపీ బ్రౌన్ స్మారక లైబ్రరీకి రూ.905 కోట్లు ప్రతిపాదించారు.

బడ్జెట్ అంచనా రూ.2.10 లక్షల కోట్లు

అన్ని శాఖలకు సంబంధించిన ప్రాధాన్యాలు, వారి డిమాండ్లపై ఆర్థికశాఖ మంత్రి బుగ్గన రాజేంద్రనాథ్ ఆయా శాఖల మంత్రులు, అధికారులతో సమీక్షలు నిర్వహించారు. ఎన్నికలకు ముందు ప్రభుత్వం శాసనసభకు సమర్పించిన ఓట్ ఆన్ అకౌంట్ బడ్జెట్లో దాదాపు రూ.2.26 లక్షల కోట్ల అంచనా వ్యయంతో బడ్జెట్‌ సమర్పించారు. ప్రస్తుతం ఆర్థిక సంవత్సరంలో కొత్త ప్రభుత్వం సమర్పించనున్న బడ్జెట్‌ స్వరూపం కొంత మేర తగ్గే అవకాశముందని తెలుస్తోంది. రూ.2.10 లక్షల కోట్ల నుంచి రూ.2.17 లక్షల కోట్లు ఉండవచ్చని తెలుస్తోంది. అయితే అన్ని ప్రభుత్వ శాఖల ప్రతిపాదనలు రూ.2.50 లక్షల కోట్లు దాటవచ్చునని తెలుస్తోంది.

నవరత్నాలే.. కొత్త పథకాలు వద్దు

అన్ని శాఖలు నవరత్నాలకే ప్రాధాన్యం ఇవ్వాలని ఇప్పటికే ఆర్థిక శాఖ మంత్రి సూచించినట్లుగా తెలుస్తోంది. ఎన్నికలకు ముందు నవరత్నాల హామీతో జగన్ అధికారంలోకి వచ్చారు. ఈ నేపథ్యంలో సంబంధిత శాఖలు నవరత్నాల అమలుకు ప్రాధాన్యత ఇవ్వాలన్నారు. ఏ ప్రభుత్వ శాఖలో నవరత్నాల అమలుకు సంబంధించి ఏ తేదీ నుంచి అమలు చేయాలి? ఈ ఆర్థిక సంవత్సరానికి ఇందుకు సంబంధించి ఖర్చు ఎంతవుతుందనే అంశాలపై చర్చించారు. అందుకు అనుగుణంగా కేటాయింపులు చూపేందుకు ప్రధానంగా కసరత్తు జరిగింది. నవరత్నాలు మినహా కొత్త పథకాలకు ఎలాంటి ఆస్కారం ఉండదని ఆర్థిక శాఖ ఇప్పటికే స్పష్టం చేసిందని సమాచారం.