ఇలాంటి వారికి ఎంతో ప్రయోజనకరం

ఎక్కడి నుంచైనా రేషన్ తీసుకునే సౌకర్యాన్ని ఇప్పటికే తెలంగాణ, ఏపీ, గుజరాత్, హర్యానా వంటి రాష్ట్రాలు కల్పిస్తున్నాయి. సెప్టెంబర్ నుంచి ఏపీ ప్రభుత్వం గ్రామ వాలంటీర్ల ద్వారా రేషన్ సరుకులు ప్రజల వద్దకే చేర్చేందుకు సిద్ధమవుతోంది. కేంద్రం మరో అడుగు ముందుకేసి, దేశంలో ఎక్కడైనా రేషన్ తీసుకునే వెసులుబాటు కల్పించేందుకు కసరత్తు చేయడం గమనార్హం. ఇది నిరుపేద, పేద, మధ్య తరగతి కుటుంబాలకు ఎంతో ప్రయోజనకరం. ఎందుకంటే ఊరు, రాష్ట్రం.. ఇలా మారినప్పుడు కార్యాలయాల చుట్టు తిరిగే బాధలు తప్పుతాయి. ఇందుకోసం దేశమంతా పనిచేసేలా ఒకే రేషన్ కార్డు విధానం అమలు దిశగా ముందుకెళ్లాలని నిర్ణయించారు. కార్డుదారులందరికీ, ముఖ్యంగా ఉపాధి వెతుక్కుంటూ ఓ ప్రాంతం నుంచి మరో ప్రాంతం వెళ్లే వలస కార్మికులకు వారికి ఎంతో ప్రయోజనకరం.

మరిన్ని రాష్ట్రాలకు IMPDS

ఇప్పటికే ఇంటిగ్రేటెడ్ మేనేజ్‌మెంట్ పీడీఎస్ (IMPDS) విధానం ఏపీ, తెలంగాణ, కర్ణాటక, తమిళనాడు, కేరళ, గుజరాత్, రాజస్థాన్, హర్యానా, జార్ఖండ్, మహారాష్ట్ర, త్రిపుర రాష్ట్రాల్లో అమలులో ఉంది. ఈ రాష్ట్రాల్లోని ప్రజలు రేషన్ సరుకులు ఆయా రాష్ట్రంలోని ఎక్కడైనా తీసుకునే వెసులుబాటు ఉంది. మరిన్ని రాష్ట్రాల్లో IMPDSను అమలు చేయనున్నారు. ఈ క్రమంలో ఒకే దేశం, ఒకే రేషన్ కార్డు అమలు దిశగా ఆహార, ప్రజా పంపిణీ విభాగం రంగంలోకి దిగింది.

అవకతవకలకు ఆస్కారం లేకుండా...

రేషన్ కార్డుల్లో అవకతవకలకు ఆస్కారం లేకుండా ఉండేందుకు కేంద్రస్థాయిలో కార్డుల సమాచారంతో ఒక వ్యవస్థను ఆహార మంత్రిత్వ శాఖ ఏర్పాటు చేయనుంది. ఇందులో ఆహార, ప్రజా పంపిణీ విభాగం చేసే పని కీలకం. కాగా, FCI, CWC, SWC, ఇతర ప్రయివేటు గోదాముల్లో 612 లక్షల టన్నుల ఆహార ధాన్యాలను రేషన్ షాపుల ద్వారా ఏటా 81 కోట్ల మంది లబ్ధిదారులకు పంపిణీ చేస్తున్నారు. సరుకుల కొనుగోలు నుంచి పంపిణీ వరకు అవినీతి లేకుండా చేసేందుకు సాంకేతికతను వినియోగించనున్నారు.